Accessibility links

чәршәмбе, 7 декабрь 2016, Казан вакыты 01:02

AQŞ prezidentı Buş xalıqara terrorğa qarşı suğışnı däwam itteräçäk


AQŞ prezidentı Buş 2001-nçe yılnıñ 11-nçe sintäberendä bulğan höcümgä 4 yıldan artıq vaqıt ütkännän soñ, üzeneñ xalqara terrorğa qarşı suğış turındağı qaraşların añlattı. Ul 40 minutlıq çığışı vaqıtında bu suğış belän Ğıraq konfliktı arasındağı bäyläneş turındağı üzeneñ elekke fikeren ber az üzgärtkän buluın da kürsätte.

AQŞ prezidentı Buş Pänceşämbedä yasağan çığışında, İslam militantların Salqın Suğış çorındağı kommunistlar belän çağıştırdı. Anıñ süzlärençä, alar radikal ideologiägä buysındıru häm qurqıtu yulı belän dönyanıñ zur öleşe belän xakimlek itärgä telilär. Alar üzlären ireklek köräşçeläre dip kürsätergä tırışsalar da, asılda üz teläklären tağarğa tırışqan keşe üterüçelär genä. Buşnıñ süzlärençä, inde militantlar üz dävlätlärendä problemmalar xasıyl bulsa, ğäyepne Könbatışqa , berençe oçraqta AQŞ häm İzrailgä audaralar.

Audio

"İslam radiklizmnıñ täsiren anıñ yardämçeläre dä üsterä. İslam radikallarına Syriä häm İran kebek avtoritar rejimnar häm fikerdäşlär dä sıyınu urnı birä. Andıy illär Amerika häm urta yulda torğan Möselman xökümätlärenä zian kiterü maqsäten urtaqlaşalar, terrorist propoganda alıp baralar häm üz xataların qaplau öçen Könbatış, Amerika häm jähytlärne ğäyeplilär."

Buş 11-nçe Sintäber vaqiğäsennän soñ andıy törkemnärgä qarşı suğış açtı. AQŞ citäklägän köçlär Afğanistada Al Qaydanı häm anı ximayä itkän Taliban rejimın cimerde. Bügenge köndä amerikannar häm berektäşläre Ğıraqta da şuluq ruxtağı däşmanğa, fetnäçelärgä qarşı suğışalar. AQŞ prezidentı Ğıraq, möselman radikallarına qarşı suğışnıñ üzäge bulıp tora , terrorğa qarşı AQŞ cirendä tügel, ä çittä suğışu xäyerleräk dip belderep kilgän ide. Pänceşämbedäge çığışında ul mona östäp bu Al-Qaydanıñ fikere dip äytte.

Audio

"Terrorçılar Ğıraq keşeçelekkä qarşı suğışnıñ töp frontı dip xisaplıylar häm bez dä terrorğa qarşı suğışnıñ üzäge Ğıraq dip tanırğa tieşbez."

Buşnıñ süzlärençä, Könbatış berektäşlär Sintäberneñ 11-nän soñ Al Qaydanıñ 10 höcümen, şul sanda AQŞta öçesen buldırmıy qalgannar. Läkin, ul bu xaqta nindi dä bulsa täfsille mäğlümät birmäde. Buş şulay uq Könbatış, İslam militantlarınıñ höcümnären aqlarlıq ber yamanlıq ta eşlämäde dip belderde häm Könbatışqa tiskäre mönäsäbätneñ tuuına AQŞ citäklägän köçlärneñ Ğıraqqa basıp kerüe säbäp buldı digän argumentnı kire qaqtı. Anıñ süzlärençä, 2001-nçe yılda Nyu York häm Washingtonğa höcümnär yasalğanda AQŞ köçläre Ğıraqta tügel ide. Buş säyäsätne üzgärtü köç qullanunı tuqtatuğa kitermäs , şul säbäple AQŞ häm berektäşläre ber genä kurs alıp bara alalar dip belderde.

Audio

"Taşlamalar, rişvät yaki qänäğätländerü alarnıñ üterü plannarın üzgärtülärenä yaki çiklävlärenä kitermäs. Kiresençä, alar köç qullanu belän eşçänlegen üzgärtü mömkin bulaçaq dip uylağan dävlätlärgä höcüm itälär. Mondıy döşmanğa qarşı ber genä täsirle reaksiä kürsätä alabiz. Bez ber vaqıtta da çigenmiäçäkbez , birelmiäçäkbez häm ciñüdän kimeräk närsä belän rizlaşmayaçaqbız."

Başqa çığışlarındağı kebek prezident Buş bu märtäbä dä militantlarğa qarşı suğış qıyın bulaçaq häm ozaqqa suzlıaçaq dip kisätte. Ciñügä ireşkänçegä qädäre köräşergä kiräk dip belderde.

Färit İdelle, Praga.
XS
SM
MD
LG