Accessibility links

пәнҗешәмбе, 8 декабрь 2016, Казан вакыты 23:01

Ämr Mussa: Ğiraqta watandaşlar suğışı qabınırğa mömkin


Ğäräp Ligası general sekretare Ämr Mussa, Ğiraqta watandaşlar suğışı başlanırğa mömkin, dip kisätte. Kiläse atnada Ğiraqta konstitusiä turında referendum ütäçäk. BBCğa birgän äñgämäsendä Mussa, Ğiraqtağı köçlär – "qullarına eläkterä alğan här äyberne eläkterep qalırğa tırışa", dip belderde. Ğäräp Ligası diplomatları Bağdadta böten köçlärne kileşterü öçen bergä cıyarğa äzerlänä.

Ul arada köç qullanu kimemi. Bügen ğısyançılar höcümnärendä 1 ğiraqlı häläk buldı, distägä yaqın keşe yaralandı. Amerikan xärbi köçläre xäbär itüençä, 7 könlek çara waqıtında Süriä belän çik buyındağı Anbar vilayätendä 50 suğışçı üterelgän. Yefrat üzänendä ikençe ber xärbi çara däwam itä.

Ğiraq eçke eşlär ministrı Bayane Bäker Sulağ, 13nçe üktäberdän 17senä qädär kommendant säğäte kerteläçäk, dip belderde. Räsmilär 15nçe üktäberdä ütäçäk referendumğa iminlekne nığıtu çaraları kürä. Şulay uq çiklär yabılaçaq, çit ildän barı tik säwdä häm medetsina belän bäyle maşinalar kerä alaçaq. Hawa kiñlege häm diñgez portları şulay yuq yabılaçaq. Sulağ, 14nçe üktäber cirle waqıt belän kiçke säğät 6dan 16nçı üktäberneñ irtänge 6ğa qädär Ğiraqnıñ provinsiäläre arasında maşina yöreşen bötenläy tuqtatırğa çaqırdı.

XS
SM
MD
LG