Accessibility links

сишәмбе, 6 декабрь 2016, Казан вакыты 11:14

Robert Miñnullin Başqortstanda icadi säfärendä


Tatarstannıñ xalıq şağire, tanılğan däwlät häm cämäğät eşleklese Robert Miñnullin bu könnärdä Başqortstanda üzeneñ icat kiçälären ütkärä. Bik matur häm üzençälekle ütä bu kiçälär. Öç säğätkä suzılğan zur konserttan ğıybarät xalıq şağire belän oçraşular. Mäğlüm ki, Robert Miñnullin xalıq arasında kiñ taralğan, küp cırçılarnıñ repertuarına kergän yözlärçä cırlarnıñ şiğerlären yazğan şağir dä. Şuña kürä dä bu tamaşada ädipneñ şiğerlärenä yazılğan küpsanlı cırlar yañğırıy. Robert äfände Tatarstannan üzeneñ şuşı säfärenä bik küp cırçılarnı da alıp kilgän. Kürenekle cırçılar Rimma İbrahimowa, Fän Wäliäxmätov, Räsim Nizamov, Näfkät Niğmätullin, Färit Taişev, Liliä Xämitowa, Aydar Ğabdinov häm başqa sänğät ostaları çığış yasıy bu konsertta. Başqortstan yağınnan da talantlı cırçılarıbız İdris Ğäziev, Aydar Ğälimov, Fänünä Siracetdinowa, Elmir Ğäzizullinnar Robert Miñnullinnıñ şiğerlärenä yazılğan iñ populyar cırlarnı başqara. Öç könlek älege säfären Robert äfände Nefteqama şähärennän başladı. Atnaqiç könne anıñ belän Ufa tamaşaçıları başqalanıñ “Yübileynıy” mädäniät sarayında oçraştı. 1 meñ keşe sıydırışlı zalı bulğan älege mähäbät mädäniät sarayı bu tamaşağa kerergä telägän bar keşene dä sıydıra da almadı. Xalıq şağire belän küzgä-küz qarap aralaşırğa, anıñ şiğerlären, cırların tıñlarğa yäşe dä, qartı da kilgän ide. İke bülektän torğan bu cır häm şiğer bäyrämendä Robert äfände üzeneñ yaña şiğerlären dä uqıp işetterde. Şulay da tamaşanıñ zur öleşe sänğät yoldızları qaramağına birelde. Tatarstannıñ xalıq şağire Robert Miñnullinnıñ icat kiçäse, cır häm şiğer bäyräme comğa könne Başqortstannıñ Stärletamaq şähärendä däwam itä.

XS
SM
MD
LG