Tatar häm başqort xalıqlarınıñ kürenekle şağire häm mäğrifätçese Miftaxetdin Aqmullanıñ tuuına 175 yıl tulunı tantanalı bilgeläw maqsatında, Başqortstanda oyıştırılğan maxsus komitet üzeneñ çirattağı utırışın ütkärde. Anı respublika Xökümäte başlığı Rafael Baydäwlätov açtı häm alıp bardı.
Kiñäşmädä BR Prezidentınıñ «Humanist şağir häm mäğrifätçe Miftaxetdin Aqmullanıñ tuuına 175 yıl tuluğa äzerlänü turında» dip atalğan färmanı ütäleşe barışı tikşerelde. Kürkäm yübileyğa yaxşılap äzerlänü yünäleşendä eşçe törkem baytaq qına eşlärne başqarğan da inde. Utırışta çığış yasawçılar üzläre cawaplı bulğan çaralarğa äzerlek barışı xaqında xisap tottı.
Tikşerelgän tema buyınça Başqortstan vise-premyerı, mädäniät häm milli säyäsät ministrı İldus İlişev, Miäkä rayonı xaqimiäte başlığı Xäläf Musin häm başqalar çığış yasap baytaq mäğlümatlar birde. M. Aqmullanıñ 175 yıllığına äzerlekne oyıştıru komitetı Aqmulla muzeyen tergezüne, Miäkä rayonınıñ Tuqsanbay awılındağı sotsial-mädäni täğayınläneştäge obyektlarnıñ matdi-texnik bazasın nığıtu häm tözekländerüne oyıştıru eşlären başlap cibärgän dä inde. Şağirneñ tulılandırılğan cıyıntığın çığaru, anıñ sürätläre töşerelgän qälendärlär, plaqatlar häm başqa törle basma äsbaplar näşer itü dä eşçe törkemneñ iğtibar üzägendä qala.
Miftaxetdin Aqmullanıñ 175 yıllıq yübileyen bäyräm itü 2006 yılnıñ dikaberenä bilgelängän. Tantanalarğa küp kenä kürşe töbäklärdän, şul isäptän Tatarstannan da qunaqlar çaqırılaçaq.
Fänis Fätxi, Ufa
