Accessibility links

чәршәмбе, 7 декабрь 2016, Казан вакыты 23:14

Paqstan räsmiläre cir teträw näticäsendä qorbannar sanı 40 meñgä citä ala di


Şimbä könne Paqstanda bulğan cir teträwe näticäsendä häläk buluçılar sanı arta bara häm xäzer inde distälägän meñ belän isäplänä. Rixter ülçäme belän 7.6 däräcäle zilziläneñ üzäge İslamabadtan 95 çaqırım tönyaq-könçığışqa taba, Kaşmir töbäge tiräsenä turı kilgän. Qorbannarnıñ kübese dä şul täbäktän. Töbäkneñ ber yuğarı räsmie Associated Press agentlığına ülüçelär sanı 30 meñnän artır, digän ide. Qayber räsmilär isä bu san tağı da zurraq bulır di. İslamabadtağı Metereologiä üzäge räise urınbasarı general Can Möxämmät Xan radiobızğa bolay dide:

"Tögäl sannarnı äytüe qıyın, qayber yıraq awıllardan äle mäglümät yuq. Minemçä, qorbannar sanı 40 meñ çaması bulır."

Paqstan prezidentı Pärwäz Möşärräf bar dönyağa möräcäğät itep yärdäm soradı häm nindi yärdäm kirägen açıqladı:

"Bezgä xäzer keşelär kiräk tügel, bu eşkä bolay da bar armiä cälep itelgän, ğadi xalıq yärdäm itä. Bezgä xäzer yort-qurasız qalğan keşelärne sıyındıru öçen çatırlar, yataqlar kiräk."

Möşärräf şulay uq çit illärdä yäşägän Paqıstanlılarğa möräcäğät itep qullarınnan kilgänçä aqçalata yärdäm cibärergä soradı.

Çit il qotqaruçılarınnan Paqstanğa berençe bulıp Britannar kilep citte. İşelep töşkän yort xäräbäläre astınnan alar isän qalğan keşelärne qazıp çığarırğa tırışa. Bu eşlär belän citäkçelek itkän İslamabadtağı Qotqaru üzäge başlığı Dr.Rizwan söyli:

"Bu yortta 40-45 fatir bulğan, här bersendä 4-5 keşe. Xäräbälär astında 40-50 keşe qalğan bulırğa mömkin. İsän qalğannarnı ezläw, qazıp çığaru eşläre bara."

Paqstan belän Hindstan arasında distä yıllar buyına bäxäs üzäge bulıp torğan, ikegä bülengän Kaşmir töbägen zilzilä ikegä ayırıp tormağan. Qorbannar ike öleştä dä bar. Hind räsmiläre, ülüçelär sanı älegä 360, läkin bu san arta baraçaq, dip belderä. Hindstan qaramağındağı Jammu häm Kaşmir xastaxanäsenä 850 keşe kiterelgän.

Çik buyındağı Uri, Salamabad, Kupwara, Baramulla qalalarına iñ zur zıyan kilgän. Uri – Kaşmirnıñ ike öleşen bäyläp torğan yulda soñğı qala, anda 130lap keşe ülgän. Şul isäptän çik buyın saqlawçı 40lap xärbi. İsän qaluçılar xäzer üz yaqınnarın ezli, tapqannarı – yärdäm kürsätergä tırışa. Meditsina yärdäme citeşep betmi. Yäkşämbedä Salamabadta üz qızına yärdäm kötep utırğan Naz xanım:

"Qızım yaralanğan, äle dä añına kilä almıy. Bezgä berkem dä yärdäm itmi. Qaya barırğa belmibez. Min bar närsäne yuğalttım."

Xakimiättäge Kongress partiäseneñ Jammu häm Kaşmirdağı cirle citäkçese Ğöläm Nabi Azat, yärdämgä moxtaclıq bik zur di:

"Xökümät qılınnan kilgänen eşliäçäk, mondıy köçle zilziläneñ bezdä bulğanı yuq ide äle. Küp kenä xakimiät wäkilläre, xärbilär häläk bulğan, bezgä här törle yärdäm kiräk."

Köçle ziziläneñ qaytawazı Äfğanstanğa qädär barıp citkän. Anda kimendä ber keşeneñ ülüe raslanğan. Läkin tawlı töbäk awıllarınnan xäbärlär kilä başlağaç, anda da qorbannar sanı artır dip kötelä. Paqstan räsmiläre ildä 3 könlek matäm iğlan itte.

-Ali Gilmi
XS
SM
MD
LG