Qazanda Xäter könenä – şähärne Yawız İvan tarafınnan basıp aluda şähit kitkän ata-babalarıbıznı iskä aluğa äzerlek bara. Respublikada anı 15 oktäberdä ütkärü ğädättä kergän bulsa da, ber törkem millättäşlärebez iskä alu çaraların 12 oktäberdä uzdıralar. Alar nigä Xäter könen näq menä 12dä ütkärälär, anda küpme keşe cıyıla, iskä alu çarası nidän ğibärät... Bu xaqta çaranı oyıştıruçılarnıñ berse – Tatar ictimaği üzäge wäkile Rail İmamovtan soraşabız.
Xäter köne çınlıqta 12 oktäber könne bilgelänep ütelergä tieş. Çönki iske stil buyınça 2 oktäberdä, ä bezneñ stil buyınça ul ğasır öçen ayırma 10 könne täşkil itä. Xata nidän kilep çıqtı? 1989 yılnı Xäter könen bilgeläp ütärgä äzerlängändä 2senä ğädättägeçä 13 könne quşıp, 15 oktäber kilep çıqqan ide. Läkin bu döres data tügel. Monı inde ğalimnär dä isbatladı. Soñğı noqtanı respublikanıñ tarix institutı ğalimnäre quydı. Bez 1993 yıldan birle alıp barabız Xäter könen 12sendä bilgeläw ğörefen. Anda 20-30lao qına keşe cıyılsa da, bez doğa qılabız, şähit kitkän ata-babalarıbıznı iskä alabız. Bıyıl da 12 oktäberdä, köndezge säğät 12dä bez Söyembikä manarası yanında cıyılaçaqbızRail İmamov şulay uq Azatlıq radiosı aşa barlıq millättäşlärebezgä Xäter köne uñayınnan ber üteçen belän dä möräcäğät itte.
12 oktäber könne qayda ğına yäşäsägez dä mömkinçelek bulğan qädär iskä alu çaraların ütkäregez, doğalar qılığız, mäçetlärdä sädaqalar biregez. İnde anısı da mömkin tügel ikän, bu könne nindider küñel açu çaralarında qatnaşudan toyılıp torığız12 oktäberdä ütkäreläçäk Qazannı yawlap alğanda şähit kitkän ata-babalarıbıznı iskä alu çarası xaqında sez Rail İmamovnı tıñladığız. Ä tatar ictimaği üzäge millättäşlärebezne 15 oktäberdä uzaçaq Xäter könenä çaqırıp qala. İstälek tantanası säğät 10da İrek mäydanında başlanıp kitäçäk.
Gölnaz İlgizär
