Accessibility links

пәнҗешәмбе, 8 декабрь 2016, Казан вакыты 03:17

Tatarstanda küpme keşe comga namazı uquın Yunanstanda beldelär


Bu könnärdä genä Yunanstannıñ Rodos şähärendä “Mädäniätlär dialogı” dip atalğan xalıqara forum uzdı. Älege çarada tatarstannan da wäkillär qatnaştı. Tatarstan möftieneñ urınbasarı Wäliulla Yaqub, mäsälän, forumda yasağan çığışında, Tatarstan möselmannarınıñ ike protsentı ğına comğa namazına yöri dip belderde.

Yunanstanda, yäğni Gretsiädä bu forumnı Rusiä milli danı üzäge dip atalğan oyışma oyıştırdı. Soñğı yıllarda, Rusiä üzeneñ qaqşap barğan danın çit illärdä dä kütärmäkçe bit. Şuña kürä, çit illärdä zur däräcäle forumnar oyıştırıp alu – Rusiä tışqı säyäsäteneñ ber öleşe. Monnan tış, rus missionerı Andrey Pervozvannıy isemendäge fond ta, oyıştıruçı bulıp tora. Älege forumğa 40 ildän 200 läp säyäsätçe, din ähelläre, cämäğät eşlekleläre çaqırılğan ide. Tatarstannan da wäkillär bar. Prezidentınıñ säyäsät buyınça kiñäşçese Rafael Xäkimov häm tatarstan möftie urınbasarı Wäliulla Yaqub. Qızığı şunda, Tatarstannan çaqırılğan Xäkimovnı da, Wäliulla Yaqubnı da, här törle forumnarda ikäw bergä yış kürep bula. Läkin, alar, ideologik qaraşları buyınça qapma-qarşı toralar. Rafael Xäkimovnı, möfti urınbasarı, İslamnı reformalaw kiräk digän öndämäläre öçen tänqitli. Rafael Xäkimov isä, Wäliulla Yaqubnı zamannı añlamıy dip bara. Şulay buluına qaramsatn, ikäw bergä çığış yasap yörilär. Rodostağı forumda da, Rafael Xäkimov, möfti urınbasarı belän ideologik qarşılıqlarğa kerep tormağan. Ä “Xäzerge dönya häm din” digän temağa çığış yasağan. Rafael Xäkim, älege çığışında, qayber prawaslaw dine ähelläre tatarlarğa qağılışı tarixnı bozıp kürsätälär dip beldergän. Urıslar añında, tatar tarixı häm islam xäzergä qädär törle stereotiplar küzlegennän çığıp bäyälänä digän prezident kiñäşçese.

Şul uq forumda, ber urıs din ähele, sivillizatsiäle dönyanı şaqqatırırlıq çığış yasağan. Böten dönyada keşe xoquqları mä’säläse torğanda, ul däwlät keşe xoquqlarınnan yuğarıraq tora dip beldergän.

Ä Tatarstan möftie urınbasarı, mondıy, çirkäwneñ ğasırlardan ğasırlarğa däwlätne keşedän östenräk quyıp kilgän derjaavçıylıq fikerlärenä cawap birep tormağan. Ä “Tatarstanda islamnıñ cämğıäwi funksiäläre” digän temağa çığış yasağan. Näq menä şunda, Wäliulla xäzrät, Tatarstanda comğa namazına 2 genä protsent xalıq yöri digän, ürnäk kitergän. Üzeneñ süzlärenä qarağanda, hiç kenä dä bu san, anda cıyılğan urıs missionerların tınıçlandırır öçen tügel. Ä fakt ikän.

Räfis Cämdixan

XS
SM
MD
LG