Accessibility links

якшәмбе, 11 декабрь 2016, Казан вакыты 14:50

1991 yılda Vukovarda suğış cinäyätläre qıluda ğäyeplängän 3 Yugoslav xärbie östennän mäxkämä eşe başlandı


Sişmbedä Haagtağı Suğış cinäyätläre tribunalında elekke Yugoslav armiäseneñ 3 ofitserı östennän mäxkämä eşe başlandı. Veselin Şlivançanin, Mile Mrkşiç häm Miroslav Radiç 1991 yılda Xorvatiäneñ Vukovar qalasında yözlägän xorvatnı ezärlekläw, cäberläw, üterüdä ğäyeplänä. Alar üzläre bu ğäyepläwlärne kire qağa.

1991 yılda Xorvatiäneñ bäysezlek suğışı başlanğaç, Serbiä çigennän berniçä genä çaqırımda, Dunay yılğası buyında urnaşqan tınıç qına Vukovar qalası aldınğı front noqtasına äylänä. Nigezdä serblardan torğan Yugoslav armiäse bu qalağa 3 ay höcüm itä. Şul waqiğalarğa şahit bulğan Britaniäneñ Guardian gäzitennän İan Traynor iskä ala:

"Bez Vukovarğa Noyäberneñ 17lärendä, anıñ yığıluına ber kön qala kildek. Şähärdä isän bina yä ağaç qalmağan ide, bar närsä cimerelgän ide. Bez mäyetlär aşa atladıq. 3 ay buyı serb bombalarınnan xäräbälär arasında qaçıp yatqan öräk qıyäfätle keşelär kürende."

Läkin tağı da yamanrağı soñraq bula. Xorvat armiäse birelgäç, berniçä yöz keşe, şul isäptä xärbilär dä, tabiplar häm awırular belän bergä Vukovar xastaxanäsenä sıyına. Xalıqara küzätüçelär qaramağında isän qalırbız digän ömet belän. Läkin Yugoslav armiäse başqaça uylıy. Haagta uqılğan ğäyepläwlärgä kürä, Noyäberneñ 20sendä, polkovnik Mrkşiç, mayor Slivançanin häm kapitan Radiçqa buysınğan xärbilär 400läp keşene xastaxanädän çığara, şularnıñ 300läben yaqındağı Ovçara awılına, duñğızlar fermasına alıp kitep, şunda serb qorallı törkemenä tapşıra.

Quşma Ştatlarnıñ elekke däwlät sekretare, ul çaqta aradaşçı wazifasın başqarğan Cyrus Vance xastaxanäne üz küze belän barıp kürergä tırışa. İan Traynor da anıñ belän bula:

"Vukovar çitendä bez Slivançaninnı oçrattıq. Ul Vance häm anıñ törkemen, şähärdä qurqınıç dip, kertmäskä tırışa ide. Çınlıqta näq şul waqıtta distälägän keşe xastaxanädän Ovçarağa küçerelep, şunda atılıp kümäk qäberlekkä taşlanğan. Cyrus Vance şähärgä kertergä taläp itte, Slivançanin waqıt suzdı."

Duñğız fermasına quıluçılar arasında Dragutin Glasnoviç ta bulğan. Xäzer ul Xorvatiäneñ İlgä qaytuçılar berlege başlığı:

"Ovçarada min Slivançaninnı oçrattım, ul bezgä wahşilärçä, sez suğış cinäyätçeläre dip qıçqırdı. Ä bit bezneñ arada xatın-qızlar, balalar, qartlar bar ide. Kübese, barlığı 7 meñläp keşe başqa lagerlarğa küçerelde, kübese üterelde."

Ovçara fermasında barlığı 264 keşe üterelgän dip sanala. Kübese serb xärbiläre tarafınnan başta wahşilärçä cäberlänä.

7 yıl qaçıp yörgännän soñ bu 3 ofitser 2002 yılda Serbiädä qulğa alına häm Haagtağı Suğış cinayätläre tribunalına tapşırıla. Alar östennän mäxkämä eşe 6 ay barır dip kötelä.

-Ali Gilmi
XS
SM
MD
LG