Zäynäp belän Zöfärneñ Tömändäge konsertı özelä yazdı

Tamaşa bulırğa näq ber kön qalğanda 700 keşe sıydıra torğan “Geolog”lar mädäniät sarayına 100 genä bilet satılğan ide. Yoldızlarnı kürep qalırğa yaratuçı Tömän xalqı cır sänğäten töbäklärgä taratuçılarğa bu oçraqta nik bitaraf buldı soñ?

Qazan-Ufa artistlarınıñ Tömän häm Tobol şähärlärendä konsertların oyıştıruçı Färit Xäkim äytüençä, belderü käğäzläreneñ ällä qaydan, quş tırnaqlar eçendä äytkändä, “qıçqırıp tora torğan buluı” da zur ähämiätkä iä. Ber yıl kilmi qaldıñ isä, tamaşaçı küñelendäge artistqa bulğan ixtiram urınına başqa cırçı kerep oyalarğa mömkin. Tömän alarnı Salawat, Aydar häm Xäniä şikelle ük belmi. Cırçı tamaşaçını sağınıp kilsä dä, tamaşaçı anı sağınıp tora digän süz tügel şul äle.

-Sağınıp kildek äy!

-Uzğan yıl qayda buldığız soñ kürenmädegez?

-Uzğan yıl çirat citmäde Tömängä. Sebergä bez bıltır kilmäskä buldıq. Bik qatı suıqta salqın tiderep kittek tä şunnan ber yıl yal ittek.

Cırçılar äytüençä, uzğan yıl Tömän belän bergä Peterbur da näwmiz bulıp qalğan. Ber yıl Sebergä kilmi toru bärabärenä Zöfär belän Zäynäp üzläreneñ yaña gastrol'läre öçen yaña töbäklär açqannar ikän. Başqortstannıñ qolaq işetmägän Qayğış rayonına qädär barıp citkännär. Annan da qala Tatarstanda uza torğan törle bäyrämnärgä barıp cırlaw mäşäqätsezräk tä axırı...

-Törle rayonnar çaqıra bit inde. Peçän bäyräme, kişer bäyräme, uñış bäyräme...

-Çögender bäyrämendä dä buldıq.

-Zäynäpneñ tuğan töbäge Aznaqayda da çögender üsterälär tügelme soñ?

-Üsterälär. 5 nçe klasstan uq eşlägän eş şul çögender buldı inde. Qırda basuda şikär çögendere.

-Ällä xäzer çögender bäyräme dä barmı?

-Bar. Bıltır äle Zäy rayonı bik aldınğı bulıp şunda çaqırdılar. Çögender bäyrämenä.

-1 million 500 meñ tonna şikär çögendere çığarğan Zäy. Şikär çögendere more. Şuña kürä qıtlıq yuq xäzer Tatarstanda şikär çögenderenä.

-Alay bulsa sez şikärne buşqa aşıysız?

-Bezgä buşqa ber äyber kilgäne yuq. Buşqa kilgän äyber artığı öç belän çığa. Bez satıp alabız.

Zäynäp belän Zöfärneñ Tömändäge konsertın oyıştırğan Färit Xäkim äytüenä qarağanda, ägär dä kürenekle cırçılar bilet az satılğan dip konsertların quymıyça ğına Tobolğa kitkän bulsalar, aldağı yıllarda säfärlär xartiäsennän Tömänne bötenläy sızıp atarğa turı kiler ide. Belmim başqa cirdä niçekter, Tömändä tamaşaçı şulay, ğafu itmi. Konsert aldınnan ğına bilet alğan tağın 150 tamaşaçınıñ da ömeten sünderü bula. İkençe tapqır ayağın da atlamayaçaq.

Konsertqa biletlarnıñ az satıluına uraza ayı däwam itü dä ezsez tügel. Konsert başlanğan waqıt näq awız açqan çaqqa turı kilä. Ä Seberdä awız açu- zur märäsem. Tuğan-tumaça, dus-iş, kürşe-külän tabın türendä bulırğa tieş. Mullarnıñ däftärendä ay betkängä qädär ber genä dä buş yul yuq. Xalıq çiratqa küptän yazılıp betkän inde.

Zäynäp belän Zöfär uraza ayı betkängä qädär salqın tidermiçä genä Seberne urap Qazanğa qaytıp citärgä isäp totalar. Alda alarnıñ Surğutta, Tübän Wartada, Noyäberskiyda häm qotıpqa iñ yaqın şähärlärneñ berse- Yaña Urengoyda çığış yasıysıları bar.

Nail Alan. Tömän.