Accessibility links

сишәмбе, 6 декабрь 2016, Казан вакыты 11:08

Rusiä qarşılıq çarasına Tatarstan da quşıldı


12 oktäberdä böten Rusiä buylap byudjet tarmağında eşläwçelärneñ qarşılıq aksiäläre ütte. Alarnı Rusiäneñ profsoyuzlar berlege oyıştırdı. Çarada, qayber mäğlümätlärgä qarağanda, 2 millionnan artıq keşe qatnaşqan. Çaranıñ töp maqsatı – xökümätneñ byudjet tarmağında eşläwçelärneñ xällärenä iğtibarnı cälep itü, byudjetniklarnıñ xezmät xaqların kütärü. Çönki Rusiäneñ bäysez profsoyuzlar federatsiäse citäkçese Valeriy Şmakov äytüençä, älege tarmaqta eşläwçelärneñ xezmät xaqı ildä iñ tübännärneñ berse. Älege qarşılıq çarasına Tatarstanda da quşıldılar. Döresräge, Qazanda. Respublikanıñ başqa şähär-rayonnarında isä miting yäki piketlar oyıştıru kebek närsälär küzätelmäde. Qayber şähär, rayonnar ğına Qazanda uzğan çarağa ğına üzläreneñ wäkillären cibärde. Ğomumän, şähärneñ Ğäliäskär Kamal teatrı binası yanında xalıq ällä ni küp cıyılmağan ide. Çaranı oyıştıruçılar teatr yanındağı mäydanğa uqıtuçılar yäki tabiplarnı ğına tügel, ä barlıq alarnıñ xälenä kergän qazanlılarnı çaqırsa da.

Qarşılıq çarasına kilüçelär arasında kübräk uqıtuçılar, tabiplar, mädäniät oyışmalarında eşläwçelär küp ide. Yäşlär dä yış kürende. Bu yuğarı uqu yortlarınnan kilgän studentlar bulıp çıqtı. Läkin alarnıñ kübese üz teläge belän kilmägän bulıp çıqtı. Xäyer, bu añlaşıla da. Alar bit äle xezmät xaqın alıp eşläp qaramağan. Häm byudjet tarmağında bik eşlärgä dä atlığıp tormıylar. Bu xaqta çığış yasawçılar da bik açınıp söyläde. Yuğarı uqu yortın beterüçelär bezgä tülägän aqçağa ğına riza bulıp eşkä kilmilär, tizdän eşläwçelär dä qalmıy bit inde, dip zarlandılar. Şulay Vladimir Putinnıñ qayber tabiplarğa ğına xezmät xaqın kütärep, berniçä meñ uqıtuçığa ğına 10 meñ sum tülärgä täqdimen tänqitlädelär.

Xäzer byudjet tarmağında eşläwçelärne qatlawlarğa ayıru bara. Putinnıñ täqdimnäre bik äybät, xezmät xaqın arttırırğa kiräk, läkin kemnärder öçen genä tügel, ä barısı öçen dä. Bez barıbız da xezmät xaqın ber yarım tapqırğa arttırunı xuplıybız

Bu süzlärne mitingta qatnaşuçılar bik xuplap, qul çabıp qarşı aldı.

Ä Kamal teatrı yanındağı qarşılıq aksiäsendä qatnaşuçılarnı monda närsä alıp kilgän soñ? Bu sorawğa cawap birergä teläwçelärne tabası da ciñel bulmadı. Küplär monda qatnaşu maqsatın, qayan kilüen mikrofon aldında äytergä baş tarttı. Ä menä üzlären muzeyda eşläwçelär dip tanıştırğan ike xanım bezgä menä närsälär söyläde.

Min üzem pensiädä, läkin bik az pensiä alam, 2 meñ sum da yuq. Şuña kürä tağın eşlärgä mäcbürmen. Tağın muzeyda eşlim. Anda 1500 sum alam. Fatirğa, telefonğa tülim dä, aşarğa-eçärgä küpme qala inde, üzegez sanap qarağız

Min dä muzeyda eşlägän öçen 1500 sum xezmät xaqı alam. Qızım akuşerka bulıp eşli. Öygä dä qaytmıyça köne-töne eşlägän öçen 3 meñ sum xezmät xaqı ala. Şul aqçağa üzenä dä yäşärgä, ike balanı da ayaqqa bastırırğa kiräk

Şulay itep, 12 oktäber könne Tatarstan byudjetnikları da Rusiä buylap ütkän qarşılıq aksiäsenä quşıldı.

Gölnaz İlgizär

XS
SM
MD
LG