Accessibility links

дүшәмбе, 5 декабрь 2016, Казан вакыты 23:49

Omski tatarları icatı cıyıntığı näşer iteläçäk


Omski ölkäse tatarlarınıñ Qazan belän bäyläneşläre özelmi. Soñğı waqıtlarnı ğına iskä alğanda da - bıyıl iyün ayında balalar Tatarstanğa cäyge yalğa barğan idelär, ölkä sabantuyına Qazannan qunaqlar kilde, iyüldä Omski yäşläre Tatarstannıñ yal itü urınnarında bulıp qayttılar, avgust ayında Omski tatar xäräkäte aktivistları meñyıllıq bäyrämdä qatnaştılar. Häm menä tağı küptän tügel Omskida tağı ber qunaq - Tatarstan mädäniät ministrlığınıñ xalıq icatı fänni-metodik üzäge baş belgeçe İlgiz Kadıyrov bulıp kitte. Anıñ Omskiğa kilüeneñ töp maqsatı- seber tatarları folklorı buyınça cıyğan materialların bastırıp çığaruda yärdämçelär ezläw. Tıñlawçılar xäterläsä, bu materiallarnıñ İlgiz äfände tarafınnan uzğan ğasırnıñ 60-nçı yıllar axırında SSSR fännär akademiäseneñ Ğalimcan İbrahimov isemendäge tel, ädäbiät häm tarix institutınıñ fänni ekspeditsiäläre waqıtında Omski ölkäseneñ tatar awıllarında tuplanğan buluı turında “Azatlıq”ta söylägänebez bar ide. Omski ölkäsennän tış, İlgiz Kadıyrov tatar xalıq icatı buyınça materiallarnı Novosibirsi, Kemerevo häm Tomski yaqlarında da tuplağan.

İlgiz äfände süzlärençä, moña qädär bu materiallar Qazan utları jurnalında, fänni cıyıntıqlarda, Tömändä fänni konferensiä materialları bulıp basılğannar, ayırım basma bulıp näşer itelmägännär. Omskida bulğan oçraşulardan İlgiz äfände qänäğät, mädäniät ministrlığında materiallarnı ayırım basma itep çığarırğa mömkinlek bar digännär häm İlgiz äfändeneñ bu eşne axırına citkerügä ömete zurdan. Şulay itep kiläçäktä bälki Seber yaqlarındağı üzeşçän sänğät kollektivları Seber tatarları cırların üz repertuarlarına kertep xalıqqa da citkerä alırlar.

İlgiz äfände Tatarstan belän çit töbäklärdä yäşäwçe tatarlar arasında bäyläneşlär nığraq häm tığızraq bulırğa tieş dip sanıy, Qazanda ğına yatmasqa, çit töbäklärdä yışraq çığıp yörergä, xalıqnıñ ixtıäcların öyränergä, yärdäm itärgä kiräk.

Omski ölkäsendä balalar studiäse oyıştı

Omski ölkäseneñ Tara rayonında bıyıl “Yaqtaş” dip isemlängän balalar studiäse eşli başladı. Älege studiä Tara şähäreneñ balalar häm yäşüsmerlär üzäge qarşında açıldı. Anıñ citäkçese uqıtuçı Älfirä Deket. Studiädä 3 - tatar tele, cır häm qullanma sänğät tügäräkläre eşli. Döres, älegä “Yaqtaş” studiäsenä yörüçe tatar balaların barmaq belän sanarlıq. Ämma Älfirä xanım äkrenläp alarnıñ sanı artır dip ömetlänä. Sentäber axırında ul Tara tatar mädäniät üzäge, “Nur” üzeşçän sänğät kollektivı yärdäme belän studiäneñ täqdir itü kiçäsen oyıştırdı. Anda balalar ata-anaları belän kilgän idelär. Kiçä barışında milli uyınnar oyıştırıldı, balalar qısqa ğına waqıt eçendä öyrängän qayber hönärlären dä kürsättelär.

Rozaliä Sayganova, Omski

XS
SM
MD
LG