Accessibility links

җомга, 9 декабрь 2016, Казан вакыты 01:16

Räfıyk Şäräfiev: “İ buldırabız da inde!”


Bik ozaq kötelgän Qazannıñ 1000 yıllığına bağışlanğan bäyrämnär inde uzıp ta kitte. Älege bäyrämgä äzerlängändä böten şähär tözekländerelde, yäşellekkä kümelde. Bäyräm uzuğa qaramastan, yañarğan Qazannı qarap kitü öçen törle töbäklärdä yäşäwçelär äle dä başqalağa yış kilä.

Näq şuşı niät belän Baltaç rayonı Qaraduğan awılında yäşäwçe Räfıyk Şäräfiev ta Qazanğa kilgän bulğan. Üzeneñ Qazannan qaytqan tä'sirlären ul “Tatarstan yäşläre” gäziteneñ “Sezneñ xatlar” rubrikasına yazıp cibärgän.

“Meñ yıllıq bäyrämenä Qazannıñ niqädär maturlanuın – çistaruın matbuğat tämam kinänep yazğannan soñ, şul maturlıqnı kürep qaytıym äle dip, bäyräm uzıp ozaq ta ütmästän, Qazanğa aşıqtım. Gumelev häykäle torğan Peterburg uramınıñ maturlığına ixlas soqlanırğa ölgermiseñ, matur – matur utırğıçlar tiräsendäge şapşaqlıqqa küz töşep, can ärni. Andağı sıra şeşäläre, çüpläp tügel, köräp sıyırlıq tämäke töpçege … İ buldırabız da inde!

Citmäsä, ürtägändäy, näq şul könne “Azatlıq” radiosınnan ber millättäşebez ( Sember yağınnan idelär buğay) Qazan xalqın bik maqtap söyläde. İmeşter, alar utırğıçlarnı da watmıylar, sıra şeşälären häm töpçekne dä çüp sawıtına ğına taşlıylar. Ul Qazannı bäyräm könne genä kürep qaytqandır axrı. Ällä ikebez ike Qazan xaqında süz yörtäme?

Tege utırğıçlarda mälceräp tön ütkärgän (min ul tirädä irtük buldım) adämnärne äytäm äle: näq şundıylar turında bezneñ xalıq: “Aşağan tabağına…”- di bit inde. Bu oçraqta bälki: “Aşağan Qazanına …”- dip äytü urınlıdır.”

Äye, mädäni şähär tözügä qarağanda, mädäni keşelär tärbiäläw awırraq bulıp çığa. Şähär buyınça tramvay, avtobus tuqtalışların maxsus pıyaladan yasap quyğannar ide. Ämma älege tuqtalışlarnıñ inde ber öleşe bilgesez keşelär tarafınnan cimerelgän. Tuqtalışnıñ berse yöz meñ tiräse tora. Şunısı qızıq: älegä tuqtalışlar tözüçelär tarafınnan yul transport komitetına tapşırılmağan. Ä tözekländerelgän yullarnı däwlät komissiäse şuşı könnärdä genä qabul itep alaçaq.

Qazanda älege citeşsezleklärne yäşermilär, ä televidenie kanalları aşa xalıqqa kürsätep toralar. Älege wäxşilektän nişlärgä soñ digäç, küplär, bälki här tuqtalışnı saqlarğa militsionerlar quyarğa digän täqdimnär kerttelär.

Döres, böten cirdä dä alay tügel. Äytik, metroda, açılışındağı kebek ük böten cir matur häm çista.

Gölnaz Şäyxetdinova.

XS
SM
MD
LG