Accessibility links

пәнҗешәмбе, 8 декабрь 2016, Казан вакыты 12:54

Qazan Ermitajında belem birü üzäge


Qazandağı Ermitaj üzägeneñ Altın Urda däwläte turındağı kürgäzmäse belän açıluı üzençälekle buldı. Altın Urdanıñ iñ qödrätle çorın, borınğı traditsiälären, şähär mädäniäten taswirlağan bu kürgäzmä iskitkeç ähämiätkä iä. Anda törle dinnär bäyläneşläreneñ tiränlege dä kürenä. Kürgäzmägä quyılğan här eksponat zur ähämiätkä iä. 13-15 ğasırlardan qaytawaz bulıp qalğan altın-kömeş belän bizälgän sawıtlar da, ğäräp-uyğur xärefläre belän yazılğan zur qara qıya kisäge dä, qäber taşları da. Kürgäzmäneñ eşläw waqıtı nibarı ber ay yarım waqıt qına bulsa da, “Altın Urda” däwläteneñ tarixı häm mädäniäte belän 200 meñgä yaqın keşe tanışıp ta ölgergän. Alar arasında qazanlılar, turistlar ğına tügel, ä Tatarstannıñ şähär, rayonnarınnan, kürşe respublikalardan da maxsus qızıqsınıp kilüçelär bar. Ermitaj üzägeneñ direktorı Ol'ga Piul'skaya kürgäzmä turında menä närsä söyläde:

Bez yäşägän Bolğar däwläte elek Altın Urdanıñ ber öleşen täşkil itkängä kürä, tarixıbıznı barlap Altın Urdağa äylänep qaytabız. Häm kürgäzmädän kürengänçä, bezneñ babalarıbız küçenep yörüçelär genä tügel, ä çın mäğnäsendä sivilizatsiäle, bay tarixlı häm mädäniätle xalıq bulğan. Häm Altın Urda küp kenä tarixi däwlätlärneñ mädäni üseşendä, şul isäptä Rusiäneñ üseşendä dä ähämiätle rol' uynağan.

Qazan Ermitajınıñ kürgäzmälär täqdim itü genä tügel, ä mäğärif taratu digän missiäse dä bar. Studentlar şähäre bulğan Qazanda Ermitaj xezmätkärläre üzäkkä kübräk uquçı yäşlärne cälep itärgä tırışa. Bu uñaydan pänceşämbe könne Ermitaj üzägendä lektoriylar häm komp'yuter üzäge dä açıldı. Komp'yuter sıynıfında bügen 13 törle mäğlümatı programma eşli. Älege programmalarda rıtsar'lar, kenäzlär tormışınnan, skiflar, greklar turında häm başqa bik küp qızıqlı mäğlümatlar bar. Lektoriylar isä 6 yäki 12 leksiädän tora. Barlığı şulay uq 13 lektoriy häm alarnıñ barısı da diärlek bügen ük ğämäldä. Leksiälärne tıñlarğa här telägän keşe kilä ala. Ber lektoriynı xätta 900 keşe tıñlıy alaçaq. Leksiälärgä kerü tüläwle: uquçılar öçen ber leksiä - 20 sum, ä ölkännär öçen – 50 sum tora. Beryulı böten leksiälärne tıñlarğa abonement ta satıp alırğa mömkin.

Bügen Ermitaj üzägenä kön sayın 300гә yaqın keşe kilä. Peterburgqa barası yuq, tanılğan Ermitajnıñ asılı bulğan Altın Urda eksponatları belän räxätlänep Qazan Ermitajında tanışırğa mömkin.

Al'bina Zäynulla

XS
SM
MD
LG