Accessibility links

пәнҗешәмбе, 8 декабрь 2016, Казан вакыты 12:55

«Tatnet yoldızı» iseme öçen tawış birü däwam itä


«Tatnet yoldızları 2005» bäygeseneñ näticälär bu könnärdä inde atalırğa tieş ide, ämma jyuri haman da cawabın birmäde. Tatnetçılar tüzemsezlek belän kötä. Qızıqsınu arta bara, bäygeseneñ internet säxifäsendä forum bülegendä barğan tawış birü xaqında söylägän ide. İlsezegezdä bulsa, bäygene oyıştırğan keşelärneñ berse Aynur Sibgatullin, internetçılarğa üzlärenä finalğa çıqqan säytlarğa tawış birep, räsmi bulmağan ciñüçelärneñ bilgelärgä täqdim itkän ide. Atna buyı säxifädä tawış birü bardı. Aldağı tapşıruda « Tuğan tel» nominatsiäsendä Çexiä tatarları saytı ciñep bara, dip söylägän idek. Ul Çexiädä yäşäwçe millättäşlärebezneñ milli bäyrämne niçek ütkärüe, aralaşıp yäşäwe turında söyli. Säyt tatarça häm latin xärefläre belän genä eşlängän. Baştaraq şuşı säxifä ciñep bara ide. Ämma, bu könnärdä wäzğiät üzgärgän. Berençe urınğa «Tatarça soft» digän säxifä çıqqan. Bu internet saytnı Baltaç yegetläre eşlägän. Älege säxifä internetta qullana torğan programmalarnıñ tatarçasın buldıru, yäki bulğannarın qullanuçılar öçen täqdim itü maqsatların quya. Bu sayt öçen 17 tawış birelgän, ämma berençe urın iäse yañadan üzgärergä mömkin.

Yarışnıñ «Tatar dönyası» digän törendä dä, ciñüçe alışınğan, aldağı tapşıruıbızda, iñ küp tawış qrım tatarları säxifäse öçen birelgän, dip xäbär itkän idek. Xäzer, berençe urınğa – «Tatarica» saytı çıqqan. Bu säxifä turında da söylägänbez bar, xörmätle tıñlawçılar. Bu küptänge sayt, ul başqa www.narod.ru kebek buşlay urın birä torğan resursta urnaşqan ide. Annan soñ, bizäleşen üzgärtep, eçtälegen bayıtıp, www.yuldash.com saytında urın ala başladı. «Tatarica» urıs telendä genä eşläwçe säxifä, ämma tarixi, mädäni temalarğa mäğlümatlar baylığı belän, keşelärneñ säxifädä aralaşu aktivlığı belän «Tatarica» başqalardan ayırılıp tora. «1000 yıllıq»qa bağışlanğan säxifälär arasında iñ küp tawış www.1000kzn.ru saytı öçen birelgän, monda üzgäreşlär yuq, «Tatarstan respublikası» digän nominatsiädä, Elemtä häm informatizatsiä ministrlığınıñ internet säxifäse, tatnetçılar fikerençä, iñ yaxşısı.

Bu räsmi bulmağan bäyge näticäläre genä, professional yaqtan äzerlekle häm bäygedä qatnaşuçı saytlarğa ber qatnaşlığı bulmağan jyuri ägzäläre, niçek tawış birgänder, qaysı yegetlärne häm qızlarnıñ eşläre ciñü yawlağandır, oyıştıruçılar xäbär itmilär. Näticälärne, bu könnärdä iğlan itärgä wäğdä itälär. Bezgä bilgele bulğaç, şunduq, tapşırularbız xäbär itärbez.

Bikä Timerova.

XS
SM
MD
LG