Accessibility links

якшәмбе, 4 декабрь 2016, Казан вакыты 23:32

Başqorstanda Nalçik waqıyğaların iğtibar belän küzätälär


Qabarda Balqardağı waqıyğalarnı Başqortstan xalqı da iğtibar belän küzätä. Telewidenie qanallarınıñ här yañalıqlar çığarılışı başında uq bu tem östenlek itsä dä, Başqortstannıñ räsmi xaqimiätläre genä älegä Nälçiktağı bäreleşlärgä üz mönäsäbäten bäyän itmäde. Şul uq waqıtta respubliktağı säyäsätçelär dä, törle milli oyışmalar citäkçeläre dä Qabarda-Balqar faciğäsenä qarata üz fikerenä iä, dip uylarğa kiräk. Küplär Rusiädä yaxşılap eşlängän däwlät milli säyäsäteneñ dä, şuşı çeterekle mäsälä belän töple genä şöğellänüçe ministrlıqnıñ, yä bulmasa başqa oyışmanıñ bulmawın yıllar buyı äytep kilä. Küplär Qawqazda alıp barıluçı säyäsätneñ bötenläy dä döres bulmawın açıqtan-açıq belderä. Ämma wäzğiätne üzgärtergä omtıluçı ğına kürenmi. Soñğı könnärdä Mäskäw säyäsät belgeçläreneñ nindider däwlät milli säyäsi proğraması ölgesen äzerläp betüe xaqında süz küp buldı. Anda Çeçnyä, Tatarstan häm Başqortstan Respubliklarına ayırım iğtibar bireläçäge xaqında da äytelä, imeş. Ämma älegä bu xaqta Rusiäneñ iñ zur citäkçelege üz fikeren yañğırtmadı.

Nälçiktağı qanlı bäreleşlär uñayınnan törle mäğlümat çaraları kiñ bilgele keşelärneñ fikerlären bäyän itä başladı. Misal öçen, “Prawda.ru” elektron säxifäse berniçä keşeneñ şuşı xällärgä fikeren soraşqan. Anda Rusiä Däwlät Duması deputatı Ğadjimet Säfärälievnıñ ber fikere üzenä cälep itä. Anıñ süzlärençä, Qawqazda pantyurkizm kiñ qolaç cäyä häm pantörkiçelärneñ töp maqsatı bulıp Tatarstan belän Başqortstannı ayırıp alıp, Qawqazğa quşu, dimäk, Rusiäne urtalayğa bülü tora. Şulay itep, Nälçiktağı soñğı waqıyğalarğa Tatarstan belän Başqortstannı da bäyläp quyuçılar tabıla başladı. Häm mondıy fikerne urtaqlaşuçılar da küp bulırğa mömkin. Monısı inde härkemneñ xıyal kiñlege niqädär qolaçlı buluğa bäyle. Mondıy farazlarğa Tatarstan citäkçeläre dä, Başqortstan xaqimiätläre dä üz mönäsäbätlären beldermi qalmas, möğayın.

XS
SM
MD
LG