Accessibility links

Ufanıñ borınğılığı tiräsendä ığı-zığı arta


Başqortstan tatar milli oyışmaları respublik mäktäplärendä tatar telen uqıtunı saqlap qalu xästärlege belän yörsä, başqort milli oyışmaları Ufanıñ Qazannan da borınğıraq şähär buluın isbatlaw xıyalları belän yanıp yäşi. Bötendönya Başqort qorıltayı Başqarma qomitetı täqdime belän ütkärelgän urtaq kiñäşmäsendä qayber başqort milli xäräkäte oyışmaları wäkilläre Ufağa räsmi tanılğan 430 yıl ğına tügel, ä kimendä 1 meñ yarım yıl ikänlegen raslaw öçen berlektä nıqlı eş başlarğa kileşkän. Tar dairädä genä ütkän bu oçraşuda başqort milli oyışmaları citäkçeläre äle Ufa üzägendä barğan arxeoloğıyk tikşerenülärne tağın da nığraq kiñäytü öçen respublik xaqimiätlärenä möräcägät äzerläw kiräklegen assızıqlağan. Respubliknıñ yuğarı türälärenä möräcägät itü zarurlığın başqort cämägätçelek oyışmaları başqalada arxeoloğıyk tikşerenülär alıp barılırğa tieşle urınnarda kiñ tözeleş eşläre cäyelderelü belän bäyläp añlata. Tözeleş oyışmaları üzlärenä yaña binalar tözü öçen bülengän mäydannarnı, älbättä inde, tarix qatlamnarın aqtaruçılarğa birergä telämi. Tözüçelärgä bügenge iqtisad, finans mäsäläläre möhim – başqala üzägendä här kwadrat metr altın bäyäse tora.

Älbättä, başqort milli oyışmaları Ufanıñ borınğı şähär buluın isbatlaw öçen, arxeoloğiä tikşerenülären kiñ cäyelderü mömkinlekläre sorap, elegräk tä xaqimiätlärgä möräcägät itkän ide. Ämma alarnıñ ğozerenä respublik türäläre bik qolaq salıp barmadı. Şulay da xäzer xaqimiätlär bu mäsälädä kübräk bulışlıq kürsätäçägen ışandıra başlağan, digän xäbärlär bar. Ayıruça, bu üzgäreş Başqortstan citäkçeläre Qazannıñ 1000 yıllıq yübiley tantanalarında yörep qaytqannan soñ, sizelä dilär. Monı başqort milli oyışmaları da tanıy häm räsmi xaqimiätlärneñ älege mäsäläne añlıy başlawına quanıçın belderä.

Şul uq waqıtta respubliknıñ başqort telle matbuğat basmalarında Ufanıñ Qazannan da borınğıraq şähär buluı xaqında yazmalar sanı, yañğırdan soñ çıqqan gömbälär kebek, artqannan-arta bara. Häm şunısı iğtibarnı cälep itä - başqort ğälimnäre dä, jurnalistlar da ul yazmalarda Ufanıñ borınğı şähär buluı turında isbat itärgä tırışıp, ber ük waqıtta Qazan şähärenä tibep kitüne üzläreneñ moqatdäs burıçı dip kürä. Başqortstannıñ başqort telle matbuğatında, ayırım alğanda “Yäşlek” ğäzetäsında Ufanıñ bik borınğı şähär buluın xalıq mienä señderergä tırışıp yazğan mäqälälärdä, ni öçender, Qazannıñ 1 meñ yıllıq yübileyen ütkärüennän könläşü xisläre dä östenlek itä. Mondıy çaqta nindider könläşülärgä köç sarıf itkänçe, barlıq tırışlıqnı Ufanıñ borınğılığın isbat itügä yünältsälär, xäyerleräk bulır ide, möğayın.

Fänis Fätxi, Ufa.
XS
SM
MD
LG