Accessibility links

җомга, 9 декабрь 2016, Казан вакыты 10:53

Semberdä Qazannı saqlap şähit kitkän babalarıbız ruxına yasin uqıldı


Qazannı yaqlap şähit kitkän babalarıbız ruxına bağışlanğan çara Semberdä 16 üktäberdä buldı. 14-nçe ğasırğa qarağan möselman ziratı östendä, yarım yähüd-yarım alman keşese Karl Marks häykäle yanında yasin çıqtılar häm xalqıbıznıñ bügenge xaläte turında fiker alıştılar.

Mondıy çaralar 1989-yıldan birle oyıştırılıp kilä inde. 3000 çaması keşe cıyılğan çaqlar da buldı. Ä bıyıl meriädän röxsät tä bulmağan. Çönki “Watan” firqäseneñ Sember bülekçäseneñ bu turıdağı ğözere Ölkä Qanunnar çığaru cıyılışı qabul itkän “Ğammäwi çaralar turında belderü birüneñ tärtibe” turındağı qanunğa turı kilmägän ikän. Çaranı oyıştıruçılar anda qatnaşuçılarnıñ az sanlı buluın şunıñ belän añlattılar. Barlığı 19 keşe cıyılğan ide. Alarnı da UAZ mikroavtobusında häm ciñel maşinada utıruçı “ştatskiy”lar küzätep tordılar. Berniçä märtäbä GAİ maşinası urap uzdı. Soldatlar stroe da, yal köne buluğa qaramastan, yaqında künegü adımnarı belän uzğaladı. Şulay da bäylänüçe bulmadı.

Çarada qatnaşuçılarnıñ sanı az buluwı borçılıp, xalqıbıznıñ kiläçäge şikle, diyuçelär dä buldı. Läkin “Tuğan tel” aktivistı Real'ğar İslamov andıy töşenkelekkä birelmäskä öndäde. Anıñ fikerençä, Üzäk Rusiädä xalıq sanı nıq kimi, 3 ülemgä ber bala tua. Eşçe qullar kiräklege Urta İdel urısların suırıp aluğa kiteräçäk. Çönki kön'yak xalıqlar aldında anda baruğa ike kirtä bar: “Räsäy – urıslar öçen” şiğere häm faşistlardan qurqu. Şunıñ arqasında Üzäk Aziädän kilüçe törki-möselman xalıqlar Urta İdeldä urnaşaçaq. Ä bügen kiñ taralğan urıs-tatar qatnaş ğailäläre urınına, qatnaş bulsa da, törki-möselman ğailäläre işäyer. Bu isä törki xalıqlarnıñ berdämlegenä kiterä ala.

Menä şundıy ömetläre belän belän büleşte Realgar äfände.

XS
SM
MD
LG