Accessibility links

җомга, 2 декабрь 2016, Казан вакыты 23:06

Cirle avtonomiä prezidiumınıñ çirattağı utırışında Tatar mädäni üzägeneñ eşçänlege tikşerelde


Säbäbe dä bar: İrkäm Xäyretdinov häm anıñ ike fikerdäşe Üzäk direktorı Gölsinä Gerasimovanıñ naçar eşläwe turında gubernator isemenä xat yazğannar ikän. Ä Sergey İvanoviç Avtonomiä prezidiumınıñ fikeren sorağan. Utırış isä Üzäkneñ eşçänlegen qänäğätlänerlek dip bäyäläde.

Utırış şulay uq tatarça televizion tapşırular redaktorı Ramis Safinnıñ tapşırular yazmışı turındağı mäğlümläten tıñladı. Aña qarata höcüm, başqa ölkälärdäge kebek ük, 2003 cäyendä başlanğan ide. Atnasına 45 minutlıq tapşırunıñ waqıtı 20 minutqa qaldırıldı, tapşıru waqıtı da tamaşaçı eştä waqıtqa – köndezgä küçerelde. Xätta “Çişmä” iseme dä qullanıştan çığarıldı. Xäzer şul ber çemetem “Vesti na tatarskom yazıke” digän tapşıruğa da qurqınıç yanıy. Mäskäwgä ul kiräkmi, ä gubernatorğa kiräk bulsa, üz aqçasın anıñ aqçası xisabına mömkin. Utırış, Ramis Safin täqdime buyınça, Sergey Morozovtan anıñ Mäskäwgä protest xatı yazuın sorap möräcäğät itärgä qarar qıldı. Mäğnäse – küpmillätle ölkälärne Tver' yäki Voronej kebek töbäklär belän täñgälläştermäskä, tatar, çuaş, muqşılarğa da açığraq çıray kürsätergä kiräklegen nigezläw. Gubernator bu ğözerne, bälki, ütär dä. Çönki tatar tapşıruları ğına da ayına 96 meñ rubl taläp itäçäk. Ä tağın çuaş, muqşılar bar. Ä annan milli mänfägat'lär öçen başqa çığımnar da taläp itelä. Mäsälän, “Ömet” gäzite redaktorı äytüençä, byudjetta mäğlümlät çaralarına yärdäm yözennän 32 million aqça qaralğan. Moña kitaplar çığaru ixtıyacları da kerä. Rusça kitaplar byudjet xisabına çığa ikän, tatarça da çığarılırğa tieş. Ul 6 isemdä kitaplar çığaru ixtıyacın xakimiät aldına quyarğa täqdim itte. “Çabata kiräk bulsa, Xaq Täğälädän künitek sorarğa kiräk”, içmasa, ikesenä aqça birsälär dä qänäğät bulır idek, dide ul. Ä “Ömet” üzenä 2006-yılda älegä byudjet aqçası da bireläçäk. Ä annan soñ ul da üz xisabına ğına yäşärgä tieş bulır, di.

Utırış soñında avtonomiä räise wazifaların başqaruçı Roza xanım Äxmätcanova kiläçäk eşlär turında plan-niätlär belän tanıştırdı. Kiläse cıyılışqa qädär täqdimnär äzerläw, alğa quyılğan niätlärgä qarata fikerlär äzerläw kiräklegen dä äytte.

Ayrat İbrahim, Sember.

XS
SM
MD
LG