Accessibility links

чәршәмбе, 7 декабрь 2016, Казан вакыты 17:34

17 oktäber – xalıqara fäqirlek belän köräşü köne


Dönyada distä-millionarça keşelär tuyğançı aşıy almıyça, aç xälendä yoqlarğa yatalar, xätta açlıqtan häm iñ az yäşäw şartları bulmawdan ülüçelär dä bar. Afrika, Aziä illärendä baş östendä tübäse bulmawçılar millionnar belän sanala. Beräwlärneñ is kitärlek baylıqta yözep yäşäwe, şul uq waqıtta millionnarça keşelärneñ aç-yalanğaç qaluı xalıqara cämäğätçelekne bitaraf qaldırmıy. Sivilizatsiäle illärdä iñ bay häm iñ yarlı qatlam wäkilläre arasındağı ayırma zur bulmıy. Däwlät häm xäyriä oyışmaları fäqirlärgä sotsial' yärdäm kürsätergä - oçsızlı fatir, kiem-salım, azıq-tölek birergä tırışalar. Dönyanıñ qayber illärendä tormışnıñ mul bulıp, ikençe töbäklärdä – açlıq, moxtaclıq häm awırularnıñ küplege küzätelsä, bu xalıqara tatulıqqa häm totrıqlılıqqa qurqınıç belän yanıy.

Rusiä öçençe dönya illäre belän çağıştırğanda ällä ni fäqir il dip sanalmıy, çönki anıñ tabiği baylıqları, saqlanu çaraları armiäse keçkenä tügel. Şulay da soñğı yıllarda Rusiäneñ sotsial' xälen iñ artta qalğan illär belän yışraq çağıştıralar. İñ ayanıçlısı – baylar belän yarlılar arasındağı ayırmanıñ zurlığı. Bu kürsätkeç buyınça Rusiä iñ berençe urınnarda.

Federal' däräcädä fäqirlär dip kereme yäşäw minimumınnan da tübän bulğannar sanala. Yäşäw minimumı 1700 sum bulğan Tatarstanda mondıy keşelär 9%nı täşkil itä. Dönya bankı alarğa östämä aqçalar bülsä dä, byudjetniklarnıñ xezmät xaqları beraz arttırılsa da, hawa torışı ällä ni üzgärtmäde. Ser tügel, xäyerçelekneñ çigendä yäşäwçelärneñ şaqtıy zur öleşe byudjet tarmağında eşli. Tiren tügep kön-tön eşläp, xätta yuğarı belem diplomı belän dä xäyerçelektä utıruçılar az tügel. Bu global' problema belän respublikada köräş alıp baralar. Äytergä kiräk, Rusiäneñ başqa töbäklärendä xällär tağın da möşkel.

Al'bina Zäynulla

XS
SM
MD
LG