Accessibility links

пәнҗешәмбе, 8 декабрь 2016, Казан вакыты 03:19

Saylawlarda xakimiät firkäläre wäkilläre ciñde


16 oktäber töne qayber qazanlılar öçen buş ömetlär belän xuşlaşu töne buldı. Berençedän, ciñügä ömetlängän nämzätlärneñ küpçelek öleşe ottırdı, ikençedän, qayber küzätüçelärneñ küñelendä, ğädel saylawlar ütkärü mömkinlegenä şik tudı. Tawış birüdä başqaladağı saylawçılarnıñ öçtän ber öleşe genä qatnaştı. Awıl cirendä isä, saylawçılarnıñ aktivlığı 90% qädär citte. Tatarstan buylap näticälär äle cıyılıp, äzerlänep betmägän, ä Qazan şähär saylaw komissiäse başlığı Valeriy Daşin düşämbe irtäsendä , Qazandağı saylaw näticälären iğlan itte.

16 oktäber tönendä 50 nämzät ciñü bäyräm itsä, 132 nämzät ciñelüne tanırğa mäcbür buldı. Saylawlar kierenke şartlarda ütte. Här saylaw okrugında, kandidatlar arasında, xakimiät firqäsennän çıqqan nämzätlär bulğanğa kürä, «Berdäm Rusiä» firqäse küzätüçeläre eşläde, şuña östäp, nämzätneñ üzeneñ ışanıçlı keşeläre, başqa kandidatlarnıñ küzätüçeläre tawış baru döreslegen qarap utırdı. Alar, kübesençä, ber berse artınnan küzätte, ber bersenä däğwälär belderde. Mäsälän, andıy xällär Qazannıñ Kirov rayonında, Şähär üzägendäge rayonnarda bulğan. 9 däğwä mäkxkämäğä qädär barıp citkän. Qazan şähär saylaw komissiäse başlığı Valeriy Daşin, başta, saylaw waqıtında qanun bozular bik siräk buldı digän ide. Ämma soñınnan, matbuğat oçraşuına kilgän ber xäbärçe faktlar kiterep söyli başlağaç, ul da, şähär üzägendä küpläp byületen taşlağanda ber keşeneñ totılğanın tanıdı. Bu xälne prokuratura tikşerä xäzer dide. Ämma, şul uq waqıtta, qanun bozular bulsa da, alar küp häm citdi tügel, şuña kürä, tawış birü näticäläre kiredän qaralmayaçaq ikän. «Azatlıq» radiosı xäbärçese, saylaw urınnarında irtän dä, kiçen dä buldı. Ämma ber waqıtta da saylaw urınnarında çiratlar küzätelmäde. Keşe az buldı. Tawış birüçelär arasında kübesençä, ölkän yäştäge saylawçılar küzätelde. Räsmi sannarğa qarağanda, Qazan buyınça keşelärneñ aktivlığı 37% bulsa, şul uq Kirov rayonındağı ayırım saylaw urınına räsmi terkälgän keşelärneñ 20-25 % ğına kilüe mäğlüm. İnde näticälärgä kilgändä, şunı äytep bula.

Saylawğa 182 keşe çıqqan bulğan, qayber cirdä ber deputat urını oçen 8 keşe köräşkän,ä qayber saylaw okruglarında 2 genä köndäş bulğan. Nämzätlär isemlegendä, Kommunistlar firkäse, Sotsial-demokratlar, LDPR, «Tormış», «Berdäm Rossiä» firkäläre wäkillären oşratıp bula ide. Ciñüçelär isemlegendä, «Berdäm Rusiä» firkäsen tarafdarların ğına kürep bula, Qazan şähär rayon başlıqları isemnären oçratıp bula, Qazan şähär idäräse başlığı Kamil İsxaqov, Qazan deputatlar şurası räise Lyudmila Andreyıva, sotsial idärä başlığı Tatyana Larionova yañadan saylanğan. «Edelweys-M» şirkäte wäkile Färit Xäyretdinov, «Bäxetle» kibete başlığı Möslimä Latıpova, Qazannıñ 2 ere aviaşirkät general direktorları, ber niçä şifaxanä baş tabibı, yäşlär oyışmalarınnan 1 keşe, xatın-qızlardan, urıslar häm tatarlardan deputlar saylanğan. 1 noyäbergä qädär, yaña ğına mandat alğan deputatlar oyıştıru cıyılışın ütkärep, yaña qanun çığaru cıyılışın formalaştırırğa tieş bula. Tatarstan buylap, saylawlarda küpçelek tawışnı «Berdäm Rusiä» firkäse häm «Tatarstan-Yaña ğasır» xäräkäte wäkilläre cıyığan, bu, xakimiätlär yaqlı ike säysi köç deputatları öçen bergäläp 72% tawış birelgän . Tatarstandağı saylawçılarnıñ barlığı 62,2 % tawış birüdä qatnaşqan.

Bikä Timerova

XS
SM
MD
LG