Sverdlovski ölkäseneñ Krasnoufim qalasında Nail Mullanurov digän ber tatar yegete yäşi. 140 gektar üz cirendä arpa, boday, solı, peçän üsterä, üz kibete bar. Tatar keşesenä xas tırış xolqı, uñğanlığı belän genä tügel, ğäcäyep ber ferması buluı belän dä dan tota Nail äfände.
Tabiğätneñ güzäl poçmaqlarınıñ bersendä, qayın urmanı belän çornatıp alınğan taw itägendä ğädäti bulmağan qorılmalar yıraqtan uq yulçınıñ iğtibarın üzenä cälep itep tora. Yaqınraq kilgäç, bu qorılmalarnıñ qızıl kirpeçtän salınğan taza ğına xucalıq ikänlegen küräseñ. İşek aldına kerü belän, sine salam tübäle cil tegermäne, şundıy uq räweştä eşlängän ızba, sirtmäle qoyı, borınğı eş qoralları tezep quyılğan pöxtä kiştälär qarşı ala. Ğömerenä cir eşkärtep kön kürüçe krästiän xezmätenä dan cırlap, anıñ könküreşenä bağışlap, açıq kük astında muzey itep maxsus eşlängän äyberlär bulıp çıqtı bu. Çäyne biredä ciz kümer samawırınnan yasap eçerälär, rizıqnı zur miçtä, çuyında peşerep aşatalar.
Ämma iñ ğäcäpländererlege alda bulıp çıqtı. Biredä nindi genä cänlek yuq ikän! Çista qanlı çabış atları diseñme, ponilar diseñme, döyä diseñme, xätta ike metrğa yaqın ozınlıqtağı krokodil da bar. Monnan tış illedän artıq törle tawıqlar, kürkälär, ürdäklär, qazlar... Häm ike ğailä strauslar. “Ğailä” dip Nail äfände ike ana straus, ber ata straustan torğan törkemne atıy. Biredä yäşäwçe barlıq cänleklärneñ xolqın, ğädätlären belep eş itä ul. Üzeneñ bu şöğelen eşmäkär “Xobbi” dip atadı. Keşelär öçen, balalar öçen totam bu fermanı, di ul.
Çınlap ta, yaqın-tirädäge şähär-awıllardan bu xikmätne kürergä kilüçe balalar da, olılar da küp ikän. Küp kenä çığımnar taläp itsä dä, bu eşne taşlarğa uylamıy Nail Mullanurov. Kiresençä, tağın da zuraytırğa, kiñäytergä uylıy. Çın küñeldän tormışnı, tabiğätne yaratuçı keşe bularaq, yaqtaşları bik xörmät itälär anı.
Fäwiä Safiullina Yekaterinburg.
