Accessibility links

җомга, 9 декабрь 2016, Казан вакыты 20:18

Qazanda xakimiät firqäse wäkilläre dä ciñelde


Saylawlar ütep kitte. Qazan häm respublikanıñ başqa şähärlärendäge, awıllarındağı keşelär, näticälär turında söyläşä xäzer. Berençedän, Tatarstan buylap, xalıqnıñ saylawlarda qatnaşuı, kötelgännän kübräk buldı, dide Mintimer Şäymiev, saylawlardan soñ ütkän matbuğat oçraşuında. Barı Tatarstanda ğına xalıqnıñ aktivlığı 62% tiräse, Başqortstanda - 50% bulğan, Orenburda - 47%. Barlıq rayon başlıqları yañadan saylanğan, barı Balıq Bistäsendä genä rayon başlığı eş urının yuğaltaçaq. Monı Prezident, ğäcäp xäl tügel, dide, kemne citäkçe itärlär ul rayondağı keşelär, bu alarnıñ eşe, dide ul. Şul uq waqıtta, Prezident, Qazan, saylaw aldı çorında här rayon başlığınıñ eşen küzätte, dip tä äytte.

999 deputattan yartısınnan artığı , «Berdäm Rusiä» firqäsennän saylanğan. Tağın «Tatarstan-Yaña ğasır» xäräkätennän çıqqan deputatlarnı da iskä alsaq, xakimiätkä yaqın säyäsi köçlärdän saylanğan deputatlarnıñ sanı 72% bulğan, dip äytergä mömkin. Saylawlarnı qanunça ütkärmäw turında barlığı 50 däğwä belderelgän, alardan barı 2se genä urınlı, dip tabılğan. Yäğni bäxäsle mäs’älälär bulsa da, saylaw näticäläre kiredän qaralmayaçaq. Ber Qazan gäziteneñ şimbä sanında, Qazanda saylaw könne bulğan xäl turında süz bardı. Xalıqnı saylawğa kitertü öçen, mäsälän Qazan däwlät meditsina universitetı studentları, saylawğa baruı turında xisap tapşırıp barğannar, universitet uqıtuçıları, här studenttan saylawğa barunı taläp itkän. Nämzätlärneñ berse, şuşı universitetta eşlägän bulğan ikän. Ämma, barıber, studentlar barısı da tawış birep qaytsa da, ul nämzät, «Berdäm Rusiä» firqäse wäkile bulsa da, saylawda ciñä almağan. Qazandağı saylawlar şunıñ belän ğäcäp buldı, «Berdäm Rusiä» firqäse wäkilläre dä, törle cawaplı urınnarda eşlägän zur citäkçelär ciñä almağan. Alar urınına eşmäkärlär, zur citäkçelärneñ qızları, mäsälän İbragimov okrugında «Radiopribor» zavodı derektorı qızı,Qazan şähär idäräse başlığınıñ yärdämçese, 1000 yıllıqa qädär kiñ cämäğätçelekkä bik bilgele bulmağan Qazan ratuşası citäkçese häm başqa şundıy urınnarda utıruçı nämzätlär ciñgän. Qazan şähär başlığı saylawğa çıqqan Wahapov okrugında, Kamil İxsqakov 60% tawış belän ciñgän, dip yaza gäzitlär.

16 oktäber tağın ber yañalıq alıp kilde. Munisipal saylawlar belän Tatarstan Däwlät Şurasında ber urın buşap qalu säbäple, ber okrugta östämä saylaw ütkärelgän bulğan. Anda Aleksandr Tarkaev isemle nämzät ciñgän. Anıñ öçen dä tawış birgän keşelärneñ 62% yaqını tawış birgän ikän. Aleksandr Tarqaev iseme Däwlät Şurasına saylawlar ütkärelgändä mäğlümat çaralarında eş telgä alındı. Ul Tatarstandağı uñ köçlär firqäseneñ wäkile bulıp saylawlarğa çıqqan ide, ämma ciñä almadı. Deputat bulu bäxete aña menä xäzer genä yılmaydı, şulay itep, «Berdäm Rusiä» firqäse tarafdarları häm berniçä kommunist bulğan tatarstan parlamentında 1 keşe uñ köçlärdän dä bulaçaq.

Bikä Timerova

XS
SM
MD
LG