Accessibility links

шимбә, 10 декабрь 2016, Казан вакыты 04:04

“Tatarstan poçtası”nıñ yazmışı niçek xäl iteler?


Eş şunda ki, öç yıl elek Rusiä xökümäte töbäklärne berläşterep, “Poçta Rossii” şirkäten yasağan ide. Bu şirkätkä barlıq Rusiä töbäkläreneñ poçta idäräläre berläşterelde. Tatarstannan qala. “Tatarstan Poçtası” isä 1994 yılda respublika belän federal' üzäk arasında tözelgän wäkälätlärne büleşü şartnamäse buyınça Tatarstan qaramağında qaldı. Alay ğına da tügel, bu cäydä “Tatarstan Poçtası” däwlät oyışmasınnan açıq aksioner cämğiätkä äylände. Cawapqa Rusiä elemtä ministrlığı Tatarstan cir häm milek mäs’äläläre ministrlığın xökemgä tarttı. “Tatarstan Poçtası”nıñ qanunsızlığın isbatlaw belän Rusiä elemtä ministrlığı isemennän Rusiä elemtä agentlığı şöğellänä, dip yaza Sinyus säxifäse. Agentlıq xezmätkärläre fikerençä, Tatarstan belän Rusiä arasında tözelgän şartnämä Rusiä Konstitutsiäsenä qarşı kilä ikän. Konstitutsiä buyınça däwlät poçta elemtäläre barı tik federal' qaramaqtağı milek nigezendä barlıqqa kilä ala häm alar federal' poçta oyışmaları bulırğa tieş.

Läkin Mäskäw arbitraj mäxkämäse bu eş belän Tatarstan üze şöğellänergä tieş di, mäskäwlelär fikerençä, bu Tatarstan mäxkämäseneñ eşe. Tatarstanda isä Rusiä elemtä agentlığınıñ däğwäsın nigezsez dip sanıylar. “Tatarstan Poçtası” federal' häm respublika qanunnarın isäptä totıp aksionerlığa äylände, di Tatarstannıñ mäğlümat häm elemtä ministrı Färit Fazılcanov. Ministr äytüençä, açıq aksionerlı cämğiätkä äylängäç, “Tatarstan Poçtası” yaxşıraq ta eşli başladı. Soñğı yıllarda respublikanıñ poçta elemtäsen üsterügä üzäk aqçalar birmägän. “Tatarstan poçtası” fäqät üz aqçasına yäşi, dide ministr.

Bu bäxäsneñ niçek tämamlanasın özderep kenä ber kem dä äytä almıy. Ber yaqtan qarağanda, eş Qazanda urnaşqan mäxkämädä qaralaçaq, ikençe yaqtan küz salsañ, anıñ yazmışı barıber - federal' xökemdar. Kesäsendä Rusiä prezidentı imzalağan tanıqlığın yörtüçe xökemdar qarar çığaraçaq.

Al'bina Zäynulla

XS
SM
MD
LG