Accessibility links

шимбә, 10 декабрь 2016, Казан вакыты 08:11

“Qıynalğan Rusiä”: Başqortstanda qıynaluçılar Mäskäwdä ğädellek ezli


20 üktäberdä Mäskäwneñ bäysez matbuğat üzägendä “Blagoveçenda qaza kürgännärne prokuratura yaqlawdan baş tarta” digän isem astında matbuğat oçraşuı ütte. Bu oçraşuda advokat Stanislav Markelov, xoquq yaqlawçı Lev Ponamarev, “Qıynalğan Rusiä” dip atalğan xäräkät citäkçese Veronika Şaxova, xoquq yaqlawçı İldar İsangulov, Başqortstannan militsiä xezmätkärläre qulınnan qaza kürüçelär häm alarnıñ tuğannarı qatnaştı.

Veronika Şaxova Blagoveçenda uzğan yılnıñ dekaber ayında bulğan qıynawlar xaqında berençe tapqır yazıp çıqqan jurnalist. Ul jurnalist qaharmanlığı öçen Artem Borovik isemendäge büläkkä dä layıq bulğan. Jurnalistlar aldındağı çığışında ul, “bez Mäskäwgä ğadellek ezläp kildek. Rusiä xökümätenä häm kiñ cämäğätçelekkä üzebezneñ tawışnı işetterergä telibez dide. Mondıy qıynawlar Başqortstanda ğına tügel. Qalmıqstan, Krasnodar häm başqa ölkälärdä dä bulğan dide. Ul şulay uq Blagoveçendağı xällärne nihayät mäxkämägä kiterep citkerdek, läkin xökemgä tartılırğa tieşle keşelär yağınnan qaza kürüçelärgä basım başlandı. Xäzer inde basım ğına tügel turıdan turı yanawlar bara dide. Bezneñ taläplär dide Veronika Şaxova, Rusiäneñ eçke eşlär ministrın eşennän azat itärgä, ä inde Başqortstan eçke eşlär ministrın mäxkämägä tartırğa.

Matbuğat oçraşuında süz şulay äle 2002 yılda Grızlov tarafınnan çığarılğan yäşeren färman turında da bardı. Rusiäneñ törle töbäklärendä bulğan militsiä xezmätkärläre tarafınnan qinawlar, filtrasiä lagerları şul färmängä tayanıp eşlänä dide xoquq yaqlawçılar häm alar ul färmänne ğämäldän çığarunı da taläp itä. Blagoveçenda qaza kürüçelärne yaqlawçı Mäskäw advokatı Stanislav Markelov ta Veronika Şaxova süzlären quätläp, qaza kürgännärgä basım yasala häm advokatlarğa törle rişwätlär täqdim itelä. Şulay uq yanawlar da däwam itä, dide.

Ä menä Xäyernisa Yunısova Beloret şähärennän kilgän. Biş yıl elek anıñ ulın militsiä xezmätkärläre qıynap ütergän. Bügenge köngä qädär üterüçelär cäzağa tartılmağan. Haman da şul eşlärendä eşläp yörilär. Ä inde Xäyernisa Yunısova yanawlardan qurqıp Başqortstannan küçep kitärgä mäcbür bulğan. Ul da Mäskäwgä ğädellek ezläp kilgän. Altınçı tapqır kildem inde, dide Xäyernisa Yunısova.

Xoquq yaqlawçı İldar İsänğulov, Başqortstan prokuraturası qaza kürgännärne yaqlamıy, eşlägän bulıp qına qılana, bu xaqta Rusiäneñ baş prokurorınnan bu xällärgä iğtibar itüen taläp itäbez dip, çığış yasadı.

Näzifä Kärimova, Mäskäw

XS
SM
MD
LG