Accessibility links

Кайнар хәбәр

“Uralnıñ folklor cäye” yomğaqlaw konsertı ütte


Bu könnärdä Sverdlovski ölkä fol'klor yortı “Uralnıñ fol'klor cäye” dip atalğan yomğaqlaw konsertı oyıştırdı. İnde menä biş yıldan birle, fol'klor yortı belgeçläre Ural buylap cäyge ekspeditsiälärgä çığıp, küpmillätle cirle xalıqlarnıñ awız icatın, ğöref-ğadätlären öyränälär. Yıl sayın şuşı eşlärgä yomğaq yasaw kiçäläre uzdıru matur ber ğädätkä äwerelde.

Bu yılğı cäy Krasnoufim rayonında yäşäwçe tatarlar häm marilarnıñ, ölkäneñ tönyağında yäşäwçe “staroobryadsı”, yäğni xristian dinendäge iske yolalarğa tabınuçılarnıñ tormış-könküreşen öyränep, ezlänep, yañadan-yaña qızıqlı yaqların tabuğa bağışlanğan. Kiçä barışında şul tabışlar turında qızıqlı videoyazmalar kürsätelde, awız icatın saqlap, kiläçäk buınnarğa citkerüçelär tarafınnan bik matur konsert quyıldı.

Kiçädä, ğädättägeçä, tatar xalqına da bik zur urın birelde. Ölkä fol'klor yortı belgeçe Svetlana xanım Kuçevasova äytüe buyınça, tatar xalqı üzeneñ milli kiemnären, cır-moñın, uyın qoralların, ğöref-ğadätlären qäderläp saqlawçı millätlärneñ berse bulıp tora.

Fol'klor yortı xezmätkärläre bu yılğı bäyrämgä Krasnoufim rayonı Urta Boğalış awılında yäşäwçe Rifat ğabdraxmanovnı çaqırğannar. Rifat äfände awıl mäktäbendä inde menä utız yıldan artıq fizkul'tura däreslären uqıtuçı bulıp eşli. Aqıllı, tırış, ğädel xolqı arqasında awıldaşları anı menä inde öç tapqır rättän rayon sovetı deputatı itep saylağannar.

Monnan tış, küpqırlı sälätkä iä bulıp çıqtı Rifat ğabdraxmanov. Bernindi muzıykal beleme bulmasa da, bayanda, mandolinada, garmunda uynaw belän genä çiklänep qalmıy, xalıq uyın qoralların üz qulları belän yasap, üze bik matur itep uynıy da belä. Bäläkäydän ük sıbızğı yasarğa öyrändem dä, şunnan kitte inde, di ul, yılmayıp. Bu yulı kiçägä üze yasağan bik matur yañğıraşlı qubız alıp kilgän. Anı yasarğa niçek öyrändeñ, digän sorawğa ul bolay dip cawap birde. –“Borınğı äbilärdän inde. Äniem dä söyli torğan ide, yäş waqıtlarında, aulaq öylärdä, şäm yandırıp, qubızğa biegännär. Elek qubızlarnı ağaçtan yasağannar, xäzer timerdän. Ber äbi tuy waqıtında iske qubıznı kürsätte dä, şunnan öyrändem”.

Qubız, quray kebek muzıka qoralları belän genä çiklänep qalmıyça, başqa äyberlärdä dä muzıykal yañğıraş ezläwe turında yarım şayarıp söyläp birde Rifat äfände. Cide nota yañğıraşı taba alırlıq barlıq äyberlärdä uynap bula di ul, pıyala bankalarda, stakannarda, şeşälärdä... Bu hönärlärne tabiğät qoçağında, kötü kötkändä, yäisä kiçen at saqlağanda balalarğa da öyrätä ikän ul.

Urta Boğalış awılı yegete Rifat ğabdraxmanov “Uralnıñ fol'klor cäye” yomğaqlaw konsertında qatnaşuçılardan iñ yaxşılarnıñ berse dip tabıldı häm ör-yaña fleyta belän büläklände.

Fäwiä Safiullina, Yekaterinburg

XS
SM
MD
LG