Accessibility links

чәршәмбе, 7 декабрь 2016, Казан вакыты 21:29

Blagoveçen xälläre xaqında prokuror süze


Başqortstan prokurorı Aleksandr Konovalov bügen jurnalistlar öçen uzdırğan matbuğat oçraşuında prokuraturanıñ bıyılğı 9 aylıq eşe yomğaqları xaqında küp kenä mäğlümatlar birde. Şulay da jurnalistlarnı iñ nıq qızıqsındırğanı Blagoveçendağı xällärne tikşerü barışı xaqında ide. Ni öçen digändä, älege könnärdä Başqortstannan barğan ber törkem keşe Blagoveçendağı xällärne tikşerüne häm ğäiplelärne xökemgä tartunı taläp itep, Mäskäwdä piketlar oyıştıra. Anda qatnaşuçılar Blagoveçenda qaza kürüçelärgä xoquq saqlaw orğannarı häm xaqimiätlär tarafınnan basım yasala dip belderä. Elegräk tä xäbär itelüençä, bıltır Blagoveçen şähärendä militsiä xezmätkärläre belän şähärneñ berniçä keşese arasında kilep çıqqan tartqalaştan soñ, anda yözlärçä keşe qulğa alınğan häm qıynalğan ide. Şunnan soñ bu xällärgä bäyle unğa yaqın militsiä xezmätkäre östennän, üz wazıyfaların uzıp, xalıq belän tupas qılanğanı öçen, cinayät eşe açıldı. Ämma älegä qädär mäxkämälär bik sülpän ütä häm ğäiplelär tieşle cäzasın almıy. Alay ğına da tügel, Blagoveçendağı waqıyğalar barışında militsiä xezmätkärlärennän qaza kürüçelär, alarğa törleçä basım yasaluı xaqında xäbär itep tora. Bu xaqta da Aleksandr Konovalov üzeneñ mäğlümatların birde. “Blagoveçen şähärendäge keşelärgä basım yasaluına bäyle Başqortstan prokuraturası cinayät eşe quzğattı, - di Konovalov äfände. – Prokuraturağa Blagoveçen şähäreneñ qaza kürgän 5 keşesennän möräcägät alındı. Anda alar militsiä xezmätkärläre ğämällärenä qarata üz kürsätmälären üzgärtüne taläp itep, basım yasaluı xaqında belderä. Ämma älegä kemgäder basım yasağan keşelärneñ isemnäre açıqlanmadı. Tikşerü başlandı häm anıñ näticäläre bulır”.

Prokuror süzlärençä, ğäyeple militsionerlar östennän mäxkämä eşläre aqrın ğına bulsa da däwam itä. Älege köngä ike uçastok militsionerı Albert Soltanov belän Vasiliy Jukov şartlı räweştä öçär yılğa xökem itelgän. Mäxkämäneñ çirattağı utırışı 25 üktäbergä bilgelängän. Anda xökemgä tartıluçılarnıñ berse Blagoveçen şähäre Eçke eşlär bülege başlığı İldar Ramazanov. Prokuror äytüençä, Blagoveçendağı “zaçistkalarnı” başlawda näq menä anıñ role zur. Çönki ul respublikanıñ Eçke eşlär ministrlığı citäkçelärenä möräcägät itep, şuşı çistartularnı başlağan häm citäkçelek itkän dä inde. Şul uq waqıtta Konovalov äfände Başqortstan eçke eşlär ministrın xökemgä tartırğa prokuraturanıñ wäqälätläre citmi dip belderde. Ä keşe xoquqların yaqlawçılar da, Blagoveçendağı xällärdä qaza kürüçelärneñ baytağı da eçke eşlär ministrı Rafael Divayıvnı da wazıyfasınnan alunı häm xökemgä tartunı taläp itä.

Matbuğat oçraşuında respublika prokurorı jurnalistlarnıñ başqa sorawlarına da cawaplar birde. Baş prokuror qayber kimçeleklär bulsa da, Başqortstan prokuraturası uzğan 9 ayda küp eşlär başqardı dip bilgeläde. Qayber rayonnar häm şähärlär prokurorlarınıñ üz eşlären tieşençä ütämäwen äytep, alarnı wazıyfalarınnan alu ixtimallığın citkerde Aleksandr Konovalov.

XS
SM
MD
LG