Accessibility links

шимбә, 10 декабрь 2016, Казан вакыты 00:31

Perm ölkäse wäkillege Başqortstanda säfärdä


Başqortstanğa kürşe Perm ölkäse wäkillege eş säfäre belän kilde. Perm ölkäse Qanunnar çığaru cıyılışı räise Nikolay Devyatkin citäkçelegendäge zur ğına wäkillek eçendä räsmi dairälär dä, qayber zur şirkätlär citäkçeläre dä bar. Perm ölkäse wäkillege Ufada prezident Mortaza Räximov belän oçraşıp söyläşülär alıp bardı. Annan soñ alar Başqortstan Däwlät Cıyılışı-Qorıltayğa kilde häm anıñ räise Qonstantin Tolqäçev belän dä, parlamentnıñ törle qomitetları citäkçeläre belän dä oçraştı häm söyläşülär alıp bardı. Äñgämä barışında ike parlamentnıñ da eş täcribäse xaqında süz küp buldı. İke töbäkneñ parlamentları arasında bäyläneşlärne kiñäytü xaqında kileşende.

Perm ölkäse wäkilläre Ufadağı qayber ere şirkätlärgä dä säfär qıldı häm alarnıñ eşçänlege belän yaqınnan tanıştı. Ufanıñ yaña tözeleşlären häm istälekle urınnarın qaraw da säfär proğrammasınan çittä qalmadı. Axırda Perm ölkäse belän Başqortstan arasında üzara xezmättäşlekneñ törle yünäleşläre buyınça yaña Kileşü imzalandı. Aña Perm ölkäse Qanunnar çığaru cıyılışı räise Nikolay Devyatkin belän Başqortstan parlamentı spikerı Qonstantin Tolqäçev qul quydı. Perm ölkäse wäkillege başlığı Nikolay Devyatkin süzlärençä, soñğı yıllarda ike töbäk arasında iqtisadıy häm sotsiäl-mädäni bağlanışlar şaqtıy kiñäyde, ämma äle üzara xezmättäşlek yaña etärgeç birüne sorıy. Äle imzalanğan Kileşü şuña yärdäm itärgä tieş.

Mäğlüm buluınça, Perm ölkäsendä küp kenä tatarlar belän başqortlar da yäşi. Nikolay Devyatkin äytüençä, millättäşlärebez qaysı ğına ölkädä eşläsä dä, alar başqalarğa ürnäk bulıp tora. Soñğı yıllarda ölkädä tatar häm başqort milli-mädäni oyışmaları eşçänlege dä canlanıp kitkän. “Mädäniät häm mäğärif ölkäsendä alarğa quldan kilgänçä yärdäm itärgä tırışabız, - di Nikolay Devyatkin. – Äle imzalanğan Kileşüdä dä tatar häm başqort xalıqlarınıñ milli-mädäni ixtıyacların qänägätländerü yünäleşendä aqtiv eşläw qaralğan”.

XS
SM
MD
LG