Accessibility links

Tuymazı şähärendä “Ozın köy” bäygese


Başqortstannıñ Tuymazı şähärendä çärşämbe könne ük başlanğan “Ozın köy” töbäqära sänğät bäygese tämamlanıp kilä. Tatar häm başqort xalıq cırların başqaruçılarnıñ älege yarışması bıyıl dürtençe qat oyıştırıldı. Anda Başqortstan rayonnarınnan häm şähärlärennän genä tügel, ä Tatarstannan, Çiläbe, Irımbur, Perm ölkälärennän dä törle yäştäge talant iäläre qatnaşa. Bıyılğı bäygedä cämğıse 160 tan artıq keşe üz köçen sınap qararğa bulğan. Cırçılarğa bäyäne Flürä Kildeyärowa, Färit Bikbulatov kebek tanılğan cırçılar birä.

Bügen “Ozın köy” bäygeseneñ soñğı köne. Anda ciñüçelär bilgelänä häm alarğa büläklär tapşırılaçaq. İñ zur büläk – “Oqa” ciñel automobıyle. Aña Gran-pri iäse layıq bulaçaq. Berençe, ikençe, öçençe urınnarğa da büläklärneñ zurları äzerlängän. Tuymazı rayonı häm şähäre xaqimiäteneñ mädäniät bülege mödire Gölçäçäk Zaripowa äytüençä, başqa nominatsiälärdä ciñüçelär dä buş qul belän qaytıp kitmäyäçäk. Ciñüçelärgä büläklärne kiçen yomğaqlaw konsertı barışında Başqortstan prezidentı Mortaza Räximov tapşıraçaq, dilär. Ul bügen kön buyı Tuymazı rayonında eş säfärendä yörde. Şulay itep törle sänägät şirkätlärendä häm xucalıqlarda yörgännän soñ, ul üzeneñ säfären mädäni ölkägä qarağan küñelle eş belän tämamlıy. Xalıq cırların başqaruçılarnıñ yıl sayın uzdırıluçı sänğät bäygesenä iğtibar arta bara. Yäşlär arasında xalıq cırlarına söyü tärbiäläwgä öleşe zur anıñ.

Fänis Fätxi, Ufa
XS
SM
MD
LG