Accessibility links

җомга, 9 декабрь 2016, Казан вакыты 10:54

Könyaq Aziädä bulğan köçle cir teträwgä 2 atna tuldı


Zilzilä kiçergän Paqstanda distälärçä meñ keşe äle dä salqında, sıyınu urını taba almıy açlıqtan tilmergändä dönyanıñ yardämgä bik aşıqmawın tänqitläwçelär arta bara. Şul uq waqıtta yardäm itü turında yaña wäğdälär kilä tora. 2 atna elek cir teträw waqıtında Balakot qızlar mäktäbendä ingliz tele däresendä bulğan 15 yäşlek Hina Gul bezneñ xäbärçebezgä hälakätneñ niçek kilüe turında söyläde. Ul uqığan mäktäptä 700-läp uquçınıñ yartısınnan artığı hälak bulğan.

"Zilzilä başlanğaç uqıtuçı utırğan urınnarığızda qalığız, älegä şulay utıru yaxşıraq bulır dide. Ämma diwarlar cimerelgändä uquçılar qıçqırışa başladı. Min dä diwarlar astında qaldım. Minem bertuğanım kilep miña diwarlar astınnan çığarğa yardäm itte. Annan soñ min başqa uquçılarnı qotqarırğa bulıştım" dide Gul. Gul yäşägän Balakot şähäre cir teträwdän tulısınça cimerelep betkän diärlek. Xäzer isä kemneñ mömkinlege bar, yaqınlaşıp kilüçe salqın qıştan qaçır öçen sıyınır urın ezläp başqa urınnarğa kitä. Kimendä 51 meñ keşeneñ ğömeren özgän hälakät töbägendä meñnärçä keşe salqında, aç kileş utıra. Meditsina yardäme citmi. Berläşkän millätlär oyışması, ägär dä dönya tiz arada yardämne arttırmasa qorbannar sanı küpkä artırğa mömkin dip kisätte. Häm Paqstanğa yaña yardäm wäğdäläre kilä başladı. Comğa könne NATO Paqstanğa ber meñläp xärbien, şulay uq kiräk yaraqlar töyägän distäläp yök oçqıçın cibäräçägen belderde. NATO general sekretare Jaap de Hoop Scheffer "Bu NATO tarixında berençe märtäbä. Anda BMO qaçaqlar yuğarı komissionerınnan, NATO däwlätlärennän häm başqa illärdän ber meñ tonnadan artıq qotqaru kiräk yaraqları alıp barılaçaq" dide. Söğüd Ğärabstanı 130 million dollar, häm iñ küp yardämne Törkiä, 150 million dollar birä. Hälakät zonasına iñ berençe bulıp kilgän cit il citäkçese dä Törkiä premyer ministrı Recep Tayyip Erdogan buldı. Ul anda kiçä kilde. "Bezgä tuqtarğa yaramıy. Berençel yardäm belän genä tuqtarğa kiräk tügel. Bez üzebezneñ urta häm ozın möddätle burıçlarıbıznı da ütärgä tieş. İnfrastrukturadana alıp toraq mäs''äläsendä qädär" dide Erdogan. Balakotta isä yortlar mäs''läse genä tügel. Zilzilä andağı böten mäktäplärne dä yuq itkän. Hinanıñ uquın däwam itü öçen berdänber mömkinley Mansihra şähärendä qorılğan tirmä-mäktäp. Xäzer anıñ ğailäse dä aña mäktäpne tämamlaw mömkinlege birü öçen şul şähärgä küçärgä cıyına. Hinanıñ xıyalı kiläçäktä tabib bulu.

Naif Aqmal, Praga.
XS
SM
MD
LG