Accessibility links

пәнҗешәмбе, 8 декабрь 2016, Казан вакыты 12:57

Yekaterinburda “XX ğasır balaları” kitabı täqdim itelde


Küptän tügel Yekaterinburg şähärendä eşläp kilüçe başqort milli üzäge Ameliä Alieva-Myäsniqovanıñ “Yegermençe ğasır balaları” dip atalğan kitabınıñ ikençe basmasın täqdir itü kiçäsen oyıştırdı. Kitapnıñ berençe basması 2003нче yılda, Yekaterinburg şähärenä 280 yıl tulu uñayı belän şähär xakimiäte yärdäme belän dönya kürgän ide. İkençe basma äle küptän tügel şähär duması deputatı Oleg Xäbibullin bulışlığı belän çığarıldı. İke basma da Uralda, Yekaterinburg şähärendä yäşäwçe ataqlı şäxeslärgä bağışlana.

Kitapta Yekaterinburg qalasınıñ ikençe poçetlı grajdanı, yegermençe ğasırnıñ utızınçı yıllarında ağaç qalanı taş qalağa äwerelderüçe, ataqlı tözüçe Vasiliy Raskovalov, kürenekle kompozitor Yevgeniy Rodıygin, böyek cırçı, tatar xalqınıñ kürenekle ullarınıñ berse Niaz Dautov, küp kenä ataqlı şağirlär, artistlar, rässamnar belän bergä, tatar häm başqort milli xäräkäte başında toruçı şäxeslärgä dä zur urın birelgän. Alar arasınnan Fäymä Yosıpova, Eliza Safiullina kebek xatın-qızlarıbız turında bik kürkäm oçerklar bar.

Ameliä Alieva-Myäsniqovaäıñ ätise başqort, änise tatar millätennän bulğan. Üze 1931нче yılda Yekaterinburg şähärendä tuıp üskän, internatsional' tärbiä alğan. Anıñ ätise Taqiulla äfände Aliev bik bilgele injener-elektri, Yekaterinburg şähären elektrifikatsiäläüçe, suğış yıllarında Uralda iñ berençe trolleybus liniäsen cibärüçe keşe bulğan. Bügenge köndä Yekaterinburg şähäre uramnarınıñ berse “İnjener Aliev” isemen yörtä.

Zıyalı ğailädä tärbiälänep, kürenekle keşelär belän aralaşıp üskän qız balanıñ üsmer waqıtı yegermençe ğasır tarixında iñ tirän ez qaldırğan Böyek Watan suğışı yıllarına turı kilgän. Şuña kürä Ameliä Taqiulla qızınıñ icatında suğış afäten üz cilkäsendä tatuçılar zur urın alıp tora. “Yegermençe ğasır balaları” kitabınıñ ikençe basmasın yazuçı Böyek Ciñüneñ altmış yıllığına bağışlap çığarğan.

Täqdir itü kiçäsenä kitapnıñ geroyları, alarnıñ tuğannarı, yazuçılar, şağirlär, jurnalistlar, tatar häm başqort milli oyışmaları wäkilläre häm başqa cämäğät eşlekleläre cıyılğan ide. Bäyrämne deputat Oleg Xäbibullin açıp cibärde. Ul kitapnıñ berençe basmasın uqıp çıqqannan soñ alğan tä'sirläre turında söyläde. Şähärebez üseşenä üzlärennän şundıy zur öleş kertüçe şäxeslärneñ isemnären mäñgeläşterüneñ kiläçäk buınnar öçen bik möhim tärbiäwi ähämiätkä iä buluına basım yasap, Oleg Bähälieviç kitapnıñ ikençe basmasın çığaruda yärdäm itärgä qarar birüe turında söyläde. Ul kitapnıñ avtorına sälämätlek, ozın ğomer, icadi uñışlar teläp, istälekle büläk tapşırdı.

Ameliä xanım Alievanıñ çığışı bik dulqınlandırğıç buldı. Kiçädä şulay uq kürenekle kompozitor Yevgeniy Rodıygin, Rossiä yazuçılar cämğiäte äğzası Valentina Rade häm başqalar çığış yasadılar. İnde 90 yäşenä citügä qaramastan, Yevgeniy Pavloviç Rodıygin cıyıluçılarnı üzeneñ köçle, matur tawışı, cır-moñnarı belän quandırdı. Kiçädä şulay uq Yekaterinburg şähäreneñ 8nçe muzıykal mäktäbendä uquçılar bik matur konsert quydılar. Başqort milli üzäge qarşında eşläp kilüçe drama tügäräge kollektivı başqort telendä spektakl'lärdän özeklär kürsätte.

Täqdir itü kiçäse şulay yegermençe ğasır balaların cıynap, duslıq, tuğandaşlıq xisläre belän suğarılıp ütte.

Fäwiä Safiullina, Yekaterinburg.

XS
SM
MD
LG