Accessibility links

Кайнар хәбәр

Säyäsät: kemgä törmä şulpası, kemgä restoran


Mixail Xodorkovskiy tatar gubernatorı Ğiniätullin citäklägän Çita ölkäsendä törmädä utıra. Qayber mäğlümat çığanaqlarına qarağanda, anı inde, törmädä mujik, yäğni, eşlärgä tieşle keşe rätenä kertkännär, törmädä utıruçılarnıñ üzläre kertkän tärtiplär buyınça. Şul uq waqıtta, Xodorkovskiynıñ advokatları xäbär itkänçä, aña, Rusiyäneñ elekkege iñ bay keşeläreneñ bersenä, törmädä bernindi dä artıq östämälär, yuanıçlar yuq. Başqalar kebek ük törmä balangası belän tuyınaçaq, başqalar kebek ük rejimda yäşäyäçäk. Küzätep baruçılar, Xodorkovskiynı törmägä elägüeneñ säbäben, Rusiädäge xäzerge rejim belän añlatalar. Yäğni, oşamağan, xäzerge vertikalle federatsiä türälärenä liberal säyäsätçe Xodorkovskiy. Küzätüçelärneñ fikere şundıy. Monnan tış, rusiä prezidentı Putinğa oppozitsiädä bulğan köçlärgä dä, Xodorkovskiynıñ aqçalata yärdäm itep toruı kemnärneñder açuın qabartqan.

Ä Xodorkovskiy aqçalata yärdäm itep torğan oyışmalar säyäsi genä tügel. Mäsälän, Rusiäneñ 40 lap töbägendä Açıq säyäsät mäktäpläre eşläp kilä. Xodorkovskiynıñ bay, şäwkätle, köçle zamanında, Rusiädä beraz demokratik qaraşlar, grajdanlıq cämğiäten tözü maqsatına xezmät itär öçen tözegän “Otkrıytaya Rossiä” cämğiäteneñ ber proyektı ul. Xodorkovskiy xäzer törmädä, ä eşe däitä. Döres, bu “Açıq Rusiä” cämğiäten ber Xodorkovskiy ğına tözemägän, anıñ fikerdäşläre küp bulğan. Läkin cämğiätneñ prezidentı älegä törmädä utırırğa mäcbür bulğan olligarx. Kem äytmeşli, keşe kitä, cırı qala.

Bu könnärdä, “Açıq säyäsät mäktäbe”neñ Tatarstan bülegendä berençe uqıp çığuçılar qullarına sertifikat aldılar. Älege mäktäptä uqıp çıqqannarı xaqında. Xa, Xodorkovskiy üzenä ber firqä, partiä oyıştıra, şuña tarafdarların äzerli tügelme soñ dip uylawçılar küp, bu mäktäp turında. Ä mäktäptä eşläwçelär yuq di. Açıq säyäsät mäktäbeneñ Tatarstandağı PR menedjerı Ruslan Aysin söyli:

Açıq säyäsät mäktäbe ul, säyäsät, sotsial' problemalar belän qızıqsınuçı yäşlärgä yünältelgän belem birä torğan ber mägrifäti proyekt. Proyektnıñ maqsatı, ildä grajdanlıq cämğiäte buldırırğa, demokratik qimmätlär urnaştırırğa yärdäm itü öçen oyıştırılğan. Mäktäp säyäsät, säyäsi wäzğıät, kilep tuğan mäs’älälär xaqında däwlätneñ, cämğıyätneñ problemaları xaqında Rusiädä bilgele bulğan belgeçlär, ekspertlar belän fiker alışu mömkinlege birä. Bu diskussiälär oyıştırır, törle proyektlarnı ğämälgä aşırır öçen bik äybät cirlek. Mäktäp, säyäsi proyekt tügel. Säyäsät, xakimiät öçen köräşü Mäktäpneñ kompetentsiäsendä tügel. Uqular törle qaraşta, fikerdä toruçılar öçen açıq. Uñnar da, sullar da, urtadağılar da uqıy bezdä. Läkin, qatı radikalizmda torğannar ğına yuq. Ä bolay, Tatarstandağı mäktäptä törle säyäsi strukturalar wäkilläre, kommunistlar, demokratlar, millätçelär , däwlät oyışmalarında eşläwçelär, jurnalistlar uqıy

Älege Açıq säyäsät mäktäben bıyıl Tatarstanda 46 keşe tämamladı. Alar Ruslan sanap ütkän törle sotsial' törkemnär wäkilläre.

Yıl buyına, ay sayın Mäskäwdän kilgän ekspertlar qatnaşında seminarlar ütte, kvartalğa ber ike könlek uqular oyıştırıldı.

Ruslan Aysin söyli:

Minemçä, tıñlawçılar öçen, iñ qızıqlı tä'sir qaldırdı säyäsättäge liderlıq turında bulğan seminar. Qızığı şunda, bu seminarda qatnaşqan küp kenä Tatarstan säyäsätçeläre dä, üzlären bik beldekle dip yörgännär, seminardan soñ, aptırap qaldılar. Bik küp mäğlümatnı qullanmıy kilgännärenä

Açıq säyäsät mäktäbe, şulay itep, Xodorkovskiynıñ törmädä utıruına qaramastan, eşläp kilä. Bu könnärdä genä uqırğa dip tağın ber törkem tuplanğan. Ber urınğa 4 keşe köräşkän konkurstan 46 keşe saylap alınğan . Alarda, elgärläre kebek ük, rusiädä säyäsät alıp baru üzençäleklären, Mäskäwdä kilgän ekspertlar belän öyränäçäklär.

Räfis Cämdixan

XS
SM
MD
LG