Accessibility links

Кайнар хәбәр

Qazanda munitsipal berämlek başlığı saylandı


Şähär xalqınıñ tormış däräcäsen kütärergä, yullarnı, uramnarnı tözekländerergä, gazsız qalğan yortlarğa gaz kertergä, toraq şartların yaxşırtırğa, xalıqnıñ xezmät xaqın artırırğa - bu Qazannıñ elekkege başlığı Qamıl İsxaqovnıñ Qazan başlığı itep saylanğanda birgän wäğdäläre. Qazan ratuşasında, elekkege morzalar cıyılışı binasında, uzğan sessiädä munitsipal' berämlege başlığına ike kandidat täqdim itelde. Başqalanıñ elekkege başlığı Qamıl İsxaqov häm “KOMZ” cämğiäte direktorı Vladimir Jdanov. 45nçe okrug deputatı bulğan Vladimir Jdanov şähärdä yarlılıqnı beterergä, Qazan bistäläreneñ, ayırım alğanda Därwişlär bistäseneñ tormışın caylarğa, tözekländerergä wäğdä itte.

Qazan ratuşasında uzğan saylawda şähärneñ munitsipal' berämlegenä saylanğan 50 deputatnıñ 49-ı qatnaştı. 47 deputat Qamıl İsxaqov öçen tawış birde, 1се - qarşı çıqtı, 1byulleten' yaraqsız dip tabıldı. Häm küpçelek tawış belän Qazan şähäre munitsipal' berämlege wäkillekle orğanı başlığı itep Qamıl İsxaqov saylandı. Qamıl İsxaqovnı qotlap, Tatarstan prezidentı başqalanıñ cirle üzidarä deputatlarınıñ yaña şartlarda yäşi başlayaçağı turında, 2009 yıldan soñ alarnıñ, ğomumän, möstäkıyl' räweştä eşläwe xaqında söyläde. “Bügen cämğiättä citdi üzgärtep qorular bara. Sez alarnı tormışqa aşıruda zur rol' uynıysız”, dide prezident. İlbaşı bigräk tä meditsina häm mäğärif ölkäsendä zur eşlär kötelüen bilgeläp ütte.

Ratuşadağı fiker alışuda şulay uq Qazannıñ yaña mikrorayonnarında balalar baqçaların tözü häm İske Tatar bistäsen tözekländerü kebek mäs'älälär kütärelde. M.Şäymiev Qazannıñ meñellığına äzerlek waqıtında başqalanıñ bu öleşenä iğtibar citmi qaluın äytte. Bälki ul yaxşığa da, dide prezident, bügen bezneñ aşıqmıyça älege bistäne tatar milli mädäniäten çağıldıruçı tarixi urın bularaq tözekländerergä mömkinlek bar, dip söyläde Tatarstan prezidentı.

Sessiädä şulay uq munitsipal' berämlege başlığı urınbasarın saylaw, daimi komissiä buldıru kebek mä'sälälär quyıldı. Qamıl İsxaqovnıñ urınbasarı itep 35нче Ğarifcan saylaw okrugınıñ deputatı Lyudmila Andreewa saylandı. Q.İsxaqov tarafınnan täqdim itelgän Lyudmila Andreewağa 49 deputat tawış birde, dip yaza İntertat ru elektron gäzite.

16 oktäberdä saylanğan deputatlar kemne şähär duması başlığı itep saylar ikän digän soraw aktuаl' tügel ide buğay. Çönki 50 deputatlarnıñ küpçelege eşquarlar, tabiplar häm şähär idäräçeläre - administratsiäne citäklägän Q.İsxaqov belän ber cepkä tezelgän keşelär. Şuña kürä Ratuşada saylaw intrigasız diärlek bardı. Tatarstan prezidentı M.Şäymiev - bez barıbız kemnärneñ deputat bulıp häm kemneñ başlıq bulıp saylanaçağın belep tordıq, dide. Ä eşlänäse eşlär, ütäläse wäğdälär turında härkem belergä xaqlı. Menä ğadi deputat niätläre häm wäğdäläre. Mawlyut okrugı deputatı Mäwsilä Yarullina söyli:

Bezneñ Elektron stadionında İdel buyı rayonınnan 350 bala şöğellänä. “Privoljanin” digän balalar klubı da bar. Anda bezneñ metodistlar, trenerlar eşli, şulay itep anda da tülärgä mömkinlege bulmağan balalar öçen şartlar tudırabız.

Mäwsilä Yarullina munitsipal' berämlekneñ xalıqnı sotsial' yaqlaw komitetı räise itep saylandı, ä Waxitov rayonı administratsiä başlığı Räfis Borhanov sotsial' üseş komitetı citäkçese urınına küçä. Byudjet komissiäsen, elekkeçä, Vladimir Jdanov citäkli, Nikolay Rıbuşkin qanunçılıq komitetı başlığı bula.

Şulay itep, Ratuşada İsxaqov belän Andreewa utıraçaq, ä Kremlevskaya uramındağı ispolkom, başqarma komitetı, räise itep kemne bilgeläw mäs’äläse açıq qaldı. Anı deputatlar häm şähär başlığı täqdim itep, kontrakt tözeläçäk.

Al'bina Zäynulla

XS
SM
MD
LG