Accessibility links

Кайнар хәбәр

Ğiraq konstitusiäse referendumda xuplandı


15nçe üktäberdä Ğiraqta uzğan refendumda tawış birüçelärneñ 78%tı konstitusiäne xuplağan. 18 vilayätneñ ikesendä genä qarşı tawışlar 3tän ike öleşne täşkil itkän, dip xäbär itelä. Saylaw komissiäseneñ matbuğat wäkile Farid Ayyar, näticälärne xupladı:

"Referendum üze – näticälär nindi buluına qaramastan, Ğiraq öçen demokratiä yulında, dönya belän köndäşlek itä alırlıq zamança cämğiät tözü yulında alğa taba zur adım. Şulay uq bu – Ğiraqlılar öçen zur uñış."

Ğiraq xökümätenä texnik yärdäm kürsätkän BMO wäkilçelege başlığı Carina Perelli, näticälär tögäl häm ışanıçlı, dip östäde. Yevropa Berlege dä tawış birü näticälären xupladı. Ber sönni ğäräp räsmie Saleh al-Motlaq, referendumda xärämläşülär bulğanı turında xäbär itte. Referendumnıñ ütüe – Ğiraqqa dikaber ayında saylawlar uzdıruğa yul aça.

Bu xäbär – Ğiraqta häläk bulğan amerikan xärbiläre sanınıñ 2 meñgä yaqınlaşqan çorına turı kilde. İl buylap köç qullanu kimemi, tönyaqtağı Söläymaniä vilayätendä intixar höcümendä kimendä 12 keşe häläk buldı.
XS
SM
MD
LG