Säyäsi repressiä qorbannarın iskä alu konferensiäse aldınnan cıyıluçılar şaw-şu quptardılar. Bilgele bulğança, uzğan yılğı taşlamalarnı aqçağa almaştıru ukazınnan soñ taşlamalardan qullanuçılar federal' häm töbäk statusına qarap bülendelär. Aqlanğan säyäsi repressiä qorbannarı isä töbäk qaramağında qaldılar häm aqçalata küpne yuğalttılar. Konferensiägä cıyıluçılar xoquqlarnı federal' däräcädä yaqlarğa kiräk digän fiker belän çıqtılar. Säyäsi repressiä qorbannarı Tatarstan respublikası ictimaği oyışması räise Röstäm Xisametdinov bu waqiğalar öçen cawaplılıqnı Tatarstan ğına tügel, ä böten däwlät alıp barırğa tieş dide. Şuña Rusiä prezidentı Vladimir Putinğa, Federal' Cıyınğa möräcäğät itärgä cıyınğannarın äytte. “Bu berençe çiratta aqça mäs’äläse dä tügel, ä däwlätneñ bezne tanımasqa tırışuı. Şunısı bezne ğäcäpländerä”, - dide Röstäm Xisametdinov “Azatlıq” radiosına.
Citäkçelär cıyılıp betkäç , konferensiä törle qotlawlardan başlanıp kitte. Mäskäw rayonı xakimiäte başlığı Güzäliä Minkina bu könneñ tarixta qara bit bulıp toruın äytte. Häm monı bäyräm köne dip äytep bulmawın assızıqladı.
1920 yıldan alıp 50нче yılğa qädär Tatarstannan 58 meñ keşe qulğa alınğan, 54 meñ kulak itep sörelgän bulğan. Bügenge köndä respublikada säyäsi repressiädän aqlanğan 6 meñ yarım keşe yäşi ikän. Alarnıñ kübese bala çaqta zıyan kürüçelär. Ä 75 keşe turıdan-turı ĞULAĞ lager'larınnan uzuçılar. 5-10 yıl alar Noril'ski, Mağadan, Amur tözeleşlärendä eşläwçelär bar. Säyäsi repressiä qorbannarı Tatarstan respublikası ictimaği oyışması räise Röstäm Xisametdinov “Azatlıq” radiosına alarnıñ istäleklären çağıldırğan kitap çığarırğa xıyallanuın äytte. “Ul lager'larda utıruçılarnıñ küpläre çit illärgä kitte, ämma Tatarstanda qalıp şaqtıy xezmät itüçelär dä buldı”, - dide ul. Alar arasında törle fänni açışlar yasağannar da bar ikän.
Konferensiädä bu yaqtı dönyadan kitüçelärne iskä alu nisbätennän 30 oktäber könne Arxangel'ski ziratında häm Lenin baqçasındağı säyäsi repressiä qorbannarı häykälenä çäçäk quyu bulaçağı äytelde.
Landış Xarrasova.
.
