Accessibility links

якшәмбе, 26 февраль 2017, Казан вакыты 22:33

AQŞ konsulı Ufada eş säfärendä


AQŞnıñ Yekaterinburg şähärendäge general konsulı John Stepanchuknıñ Başqortstanğa säfäre comğa könne dä däwam itte. Ufağa ul atnaqiç könne ük kilgän ide. Täwge könne ul Başqortstan Tışqı iqtisadıy bäyläneşlär häm säwdä ministrlığında bulıp, ozaq qına söyläşülär alıp bardı. Älege ministrlıqnıñ başlığı Boris Kolbin belän genä tügel, ä qaybar başqa ministrlar häm ere şirkätlär citäkçeläre belän dä barğan bu söyläşülärdä üzara xezmättäşlekne üsterüneñ törle yünäleşläre tikşerelde. AQŞ konsulınıñ ikençe zur oçraşuı Başqortstannıñ premyer-ministrı Rafael Baydäwlätov belän buldı. Baydäwlätov äfände John Stepanchuknı respublikanıñ qayber iqtisadıy kürsätkeçläre belän tanıştırdı. Kiläçäktä AQŞ belän üzara xezmättäşlekne häm alış-bireşne arttıru kiräklegen dä äytte premer-ministr. Äle ike yaqlı bäyläneşlär maqtanırğa nigezlek birmi. Başqortstannıñ tışqı säwdä äyläneşe kürsätkeçlärendä AQŞ barı tik 15 nçe urınnı ğına bili. Ä Amerikä Quşma Ştatları belän turıdan-turı nıqlı bäyläneşlärgä yul 1998 yılda açılğan ide. Şul çaqta Başqortstanğa törle awıl xucalığı texnikı, şul isäptän aşlıq cıyu qombaynnarı da qaytarıla başladı. 2005 yıl başına AQŞnıñ Başqortstan iqtisadına inwestitsiäläre küläme 10,5 million dollar täşkil itte. Rafael Baydäwlätov süzlärençä, bu kürsätkeçne berniçä tapqırğa arttıru mömkinlege bar häm ul mömkinleklärne tormışqa aşıru täñgälendä qayber eşlär başlanğan da inde. AQŞnıñ Yekaterinburgtağı general konsulı John Stepanchuk comğa könne Ufadağı qayber ere şirkätlär eşçänlege belän tanıştı häm başqalanıñ yaña tözeleşlären, istälekle urınnarın da qarap yörde.

Fänis Fätxi, Ufa

XS
SM
MD
LG