Accessibility links

Кайнар хәбәр

Hindstan şimbä şartlawları öçen terrorçılarnı ğäyepli


Hindstan xökümäte şimbä könne kimendä 61 keşene ütergän häm 100-dän artıq keşene yaralağan şartlawlar öçen terrorçılar cawaplı dip ğäyepläp çıqtı.

Televidenie kibet xäräbälärennän mäyetlärne tartıp çığarunı, qanğa batqan keşelärneñ yardäm sorap yögereşüen kürsätte.

Berençe şartlaw şähärneñ könbatış turistları küpläp yöri torğan tar uramda urnaşqan Paharganj bazarında bulğan. Berniçä minuttan xalıq küpläp yöregän säwdä üzäge Sanjaya Baruda şartlawlarnıñ iñ qatısı, ik küp ütergäne bulğan.

Öçençe bomba avtobusta, ber keşe yörtüçegä şikle qapçıq turında xäbär itkännän soñ şartlağan. Xäbärlärgä qarağanda, yörtüçe avtobusnı keşe bulmağan urında tuqtatqan. Barlıq yulçılarğa avtobustan çığarğa quşqan. Şunnan soñ qapçıqnı täräsä aşa tışqa taşlarğa telägän. Ämma qapçıq anıñ qulında şartlağan.

Räsmilär äytüençä, bombalar mömkin qädär kübräk keşene üterü öçen xalıq iñ küp cıyılğan urınnarğa quyılğan bulırğa oxşağan. Hindstan premyer ministrı Manmohan Singh monı terror ğämälläre dip ğäyepläp çıqtı. Ämma monıñ öçen kemnärneñ cawaplı buluın äytergä äle bik irtä dide.

"Yaqınnarın yuğaltuçılar öçen yörägem sızlıy. Min ğäyepsez keşelärgä qarşı bu oyatsın häm aldan äzerlängän höcümne ğäyeplim. Bu ilebez xalqına qarşı qurqaqlarça qılınğan terror ğämälläre" dide Singh.



Şartlawlar Hind xalqı sişämbe könne ütäçäk utlar bäyräme Diwaliğa äzerlängändä buldı. Annan soñ möselmannarnıñ Ramazan bäyräme yaqınlaşıp kilä.

Singh bu şartlawlar yaqınlaşuçı bäyrämnär aldınnan tınıçsızlıq çığaru öçen oyıştırılğanğa oxşağan dide.

"Bu şartlawlarnıñ waqıtı härkem ilebez bäyrämnärenä äzerlängän çorda qänäğätsezlek tudırır öçen saylanğan. Bez alarnıñ bu tübän niätlären ciñärgä tieş, häm alarğa uñışqa ireşü mömkinlege birmäskä tieş" dide Singh

Hindstannıñ töp xalqın hindular täşkil itä. Ämma bireda şaqtıy ğına möselmannar da yäşi. Hindstannıñ kiñküläm mäğlümät çaraları şartlawlar öçen ğäyeple dip şiklänüçelärne ezläw barışında 150-dän artıq keşe totqarlanğan dip xäbär itte. Ämma politsiä monı älegä raslamadı.

Hind televideniese moña qädär mäğlüm bulmağan İnqilabı isemle törkem cawaplılıqnı üz östenä alğan dip xäbär itte. Ämma iminlek mäs''äläre belgeçläre mondıy şartlawlarnı oyıştırırğa barı tik Paqstanda nigezlängän Laşkar-e-Taibä kebek suğışçan törkemnär genä sälätle dip isäpli.

Şartlawlar Hindstan belän Paqstan bäxäsle Kaşmir töbägendä, cir teträwdän zıyan kürüçelärgä yardäm itü öçen çiklärne açu turında söyläşülär başlağannan soñ berniçä säğät ütü belän buldı. Bügen Paqstan räsmiläre yardäm kiterü mömkinlege birü öçen berniçä urında çiklärne açu turında kileşende dip belderde. Paqstan Dählidä bulğan şartlawlarnı şunda uq ğäyepläp çıqtı. Naif Aqmal, Praga.
XS
SM
MD
LG