Accessibility links

Кайнар хәбәр

“Sember” klubı utırışı: iğtibar üzägendä – zıyalılarnı, maltabarlarnı berläşterü


Küptän tügel Ul'yanovsk ölkäsendä uñışlı ğına eşläp kilüçe «Sember» tatar maltabarları klubı çirattağı sezonnı başlap cibärde. Berençe utırışta alar ütkän yılnı başqarılğan eşläreneñ uñışlı häm citeşsez yaqları turında, kiläse yılda başqarılası eşlär turında süz alıp bardılar. Äytergä kiräk, «Sember» klubı öçençe yıl eşläp kilä häm şuşı öç yıl däwamında ul baytaq qına eşlär başqardı, şul isäptän, Sabantuy bäyrämen oyıştıruda qatnaştı häm matdi yaqtan bulıştı (mäsälän, bıyıl ğına şuşı matur bäyrämne tieşle däräcädä uzdıru öçen «Sember» isemennän yöz meñnän artıq aqça küçerelde). Şulay uq bu oyışma Dimitrovgrad şähärendä küptän tügel genä açılğan Tatar mäktäbenä matdi yärdäm kürsätte, daimi räweştä ölkäbezneñ şağirlärenä, üzeşçän artistlarına bulışıp tora. Kiläçäktä «Sember» klubınıñ planında ölkä külämendä tatar köräşen oyıştıru häm traditsiägä kertü, «Sember cırı» festivalen oyıştıru, Tatar avtonomiäse belän bergäläşep Böyek Watan suğışı qırlarında batırlarça hәlаk bulğan millättäşlärebezgä häykäl quyu, ölkädä sibelgän tatar maltabarların, zıyalıların berläşterü öçen törle çaralar oyıştıru küzdä totıla…

Äye, utırışta tatar maltabarların berläşterü mäs’äläsenä ayıruça zur iğtibar birelde. Ölkä gubernatorı Sergey Morozovnıñ ekonomika buyınça kiñäşçese, «Sember» klubınıñ prezidentı Färit Şakir ulı Ayupovnıñ fikerençä, bu mäs’älägä ayıruça zur iğtibar birergä kiräk, çönki ölkä tatarları arasında berdämlek artqan sayın, zurraq eşlär başqarırğa mömkinleklär tua. Häm tatar maltabarlarınıñ qaraşların ölkä administratsiäse külämendä yaqlarğa kiräk.

Tatar eşmäkärlären bügenge köndä biznes problemalanırınnan qala nindi mäs'älälär borçıy digän sorawğa «Sember» oyışmasınıñ tağın ber wäkile, Ul'yan ölkä zakonnar çığaru cıyılışı deputatı Rasix Mäwlet ulı Ğatawillin cawap birde. Rasix ağa ölkädä tatar telen saqlap qalu, şuşı maqsat belän balalar baqçalarında, mäktäplärdä tatar milli gruppaların açu, Qazan şähäreneñ uqu yortları belän xezmättäşlek itü turında süz alıp bardı.

Tatar maltabarlarınıñ milli añğa iä bulıp, telebezneñ, mädäniätebezneñ bügenge xalätenä borçıluı, alarnı öyränügä häm saqlap qaluğa qorılğan eşlär başqaruı – bik quanıçlı küreneş. Mäktäplärdä milli sıynıflar ber-ber artlı yabılıp torğanda, tatar telen belüçelär sanı könnän-kön kimi barğanda «Sember» tarafınnan oyıştırılğan çaralar yaqın kiläçäktä näticä birer diep ışanası kilä.

Çulpan Firğalieva, Sember.

XS
SM
MD
LG