Ramazan ayı tämamlanıp kilä. Bu könnärdä, möselmannar Qäder kiçäsen kötte. Ul Ramazan ayı betügä, 10 kön qalğan arada bula, dip sanala. Ğäyet namazı – 3nçe noyäber könendä ütkäreläçäk. Tatarstanda 2 million tatar, dip isäplänä. Alarnıñ küpçelege möselmannar, dip farazlarğa bula. Şähärdäge möselmannarnıñ barısı da mäçetkä yörep, urazanı totmasalar da, Qazandağı tatarlar arasında, sädäkäsen birep, iftar mäcleslären uzdıru ğädäti xälgä äylänä bara. Abıstaylarnı, mullalarnı mäcleskä alu awır, alarnıñ här könenä plan qorılğan, qayda, kemnärgä iftarğa baru turında söyläşelgän bula. Qazanda, xäläl aşlar birä torğan aşxanälärdä, awız açar waqıtta, keşe kübäyä, çiratlar xasil bula. «Azatlıq» radiosı xäbärçesenä şundıy xälne, Qazan üzägendäge ber kafeda kürergä turı kilde.
Ramazan ayı betügä qädär sanawlı könnär genä qaldı. Ämma, aña qädär möselmannar ber möhim burıçnı ütärgä tieş. Fitr sädäkäsen birergä. Anı birü tärtibe häm küläme turında bezgä Diniä Näzaräteneñ uqıtu bülege başlığı Rifqät äfände Nasıbulla söyläde. Anıñ äytüençä, urazalar qabul bulsın öçen, moxtaclarğa fitr sädäkäsen birü tieşle. Anıñ küläme möselmannar plenumında, 15 sumnan da kim bulmasqa tieş, dip bilgelände, dide Rifqät xäzrät. Ä ikençe törle sädäkä, zäkätne, bayraq keşelär tülärgä tieş. Ägär yıl däwamında, keşeneñ totılmıyça 36 meñ sum aqça saqlana ikän, ul keşelär baylıqlarınnan 2,5% külämendä öleş çığarıp, möhtaclarğa bülep birergä tieş ikän. Tatarstanda, küpme bay keşe, kapitalınnan küpme aqçasın bülep çığarğan, bezgä bilgele tügel, ämma Qazandağı ere eşmäkärlär arasında, mäcleslär ütkärü ğädäte bar. Mäçetlärdä dä, daimi räweştä, sädäkälär cıyılp bardı, ğibädät qılu yortlarında maxsus tartmalar tordı, dip xäbär itelä. Ğäyet namazına äzerlek eşläre başlandı inde. «TNV» kanalı Qol Şärif mäçetennän, turı transätsiä alıp barırğa cıyınuı turında xäbär itte. Qol Şärif mäçete imamı Ramil xäzrät Yunısov, härkem, Qol Şärif mäçetenä ğäyetkä kilä ala dide. Ul möselmannarnı ğäyetkä qädär, irtänge namazğa uq kilergä çaqıra. Ğäyet, 7 säğät 40 minutta uqılaçaq.
Bikä Timerova
