Accessibility links

сишәмбе, 6 декабрь 2016, Казан вакыты 19:05

Sverdlovski ölkäsendä jurnalistlar belän oçraşu


Sverdlovski ölkäsendä tolerantlıq kul'turasın üsterü buyınça Rossiä-Germaniä urtaq proyektı eşe däwam itä. Xökümät wäkilläre belän milli oyışmalar, törle etnik törkemnär arasındağı häm başqa ictimaği mönäsäbätlärne öyränep, tirän analiz yasağannan soñ, çinovniklar häm mäktäp uqıtuçıları öçen tolerantlıq kul'turasın üsterü buyınça maxsus kurslar oyıştırılıp, uqıtu alıp barıla başladı. Jurnalistlar häm uqıtuçılar arasında tolerantlıq problemaların yaqtırtu häm mäktäp balalarına tolerantlıq kul'turasın öyrätü ısulları programmasın eşläw buyınça bäygelär iğlan itelde. Nigezlämä buyınça bäygedä ciñep çığuçılar Germaniä ilenä ike atnalıq stajirovkağa baru mömkinçelegenä iä bulaçaqlar.

Bu könnärdä Yekaterinburg şähärendä älege bäygelärneñ barışın tikşerü niäte belän kilgän nemes ekspertları eşli. Alar Sverdlovski ölkäse gubernatorı rezidentsiäsendä jurnalistlar belän oçraşu oyıştırdılar. Oçraşuğa räsmi mäğlümat çaraları wäkilläre belän berlektä milli jurnalistlar da cıyıldı. Oyıştıruçılar tağın ber tapqır bäygeneñ töp nigezlären añlattılar, jurnalistlarnı tağın da aktivraq eşlärgä çaqırdılar.

Gubernator qarşında eşläp kilüçe eçke eşlär departamentı belgeçe Marina Plyasunova milli jurnalistlarnı alarnı qızıqsındırğan problemalarnı kütärü mömkinçelege belän faydalanıp qalırğa çaqırdı. Proyektnıñ Germaniä yağınnan bulğan koordinatorı Xayko äfände Fritsşe küplärneñ bezdä millätara problemalar yuq, bezdä tınıç dip qul quşırıp utıruların äytep uzdı. Xayko äfände fikerençä, aldınğı qaraşlı keşelär älege proyektnıñ cämğiät üseşenä faydalı yoğıntısın añlap eş itä.

Jurnalistlar arasındağı bäyge 1 fevral'gä qädär däwam itäçäk. Proyektnı oyıştıruçılar ğammäwi mäğlümat çaralarınıñ mä’säläneñ möhimlegen añlap, bu eştä aktiv qatnaşaçaqlarına ışanıç belderdelär.

Fäwiä Safiullina,Yekaterinburg

XS
SM
MD
LG