Accessibility links

якшәмбе, 4 декабрь 2016, Казан вакыты 19:17

Samarda xalıq muzıka uyın qoralları festivale


Samarnıñ Duslıq yortında berençe märtäbä xalıq muzıka uyın qoralları festivale uzdı. “Yäşä, uyna, minem instrumentlıym” iseme astında oyıştırılğan çara bu bolğawır zamanda çişmä suın eçkändägedäy xislär uyattı, tä'sirlärgä bay buldı.

Soñğı yıllarda Samarda festival'lärneñ nindie genä uzmıy. Bik yış mäydannardağı zur- zur säxnälärdä tönnären allı- gölle projektorlarnıñ ut öyermäse astında yarım şärä, tuzğan çäç, qolaq pärdäsen yırtırday tawışlar astında uzğan çığışlarnı mäydandağı meñlägän yäşlärneñ ükerep- ükerep tamaşa qılğanı ğädäti xälgä äylänep bette inde. Häm kinät säxnägä serle, yomşaq tawışlı quray, moğcizawi xislär däryasına taşlarday skripka sızlanuı, qubıznıñ urman serlelegenä çumdıruı, mandolinanıñ mäxäbbät xislären taratuı, qaşıqlarnıñ : “Ä bez kemnän kim?”- digändäy teläsä kemdä därt uyatuları, barabannarnıñ qaharmanlıq sıyfatların tıñlawçı küñelenä iñderüläre. Ä garmun? Garmunnar, bayannar teläsä qaysı millätneñ moñ- zarların oluğ mäxäbbät toyğıların äytä aluları belän maqtandılar sıman. Duslıq yortınıñ aktlar zalında ike säğät buyına xalıq muzıka qoralları tantana qıldı.

Ä inde Samar mädäniät, sänğät akademiäseneñ xalıq uyın qoralları orkestrı festival'ne ğäcäyep qolaçlı orbitağa kütärde. Bügenge kosmopolit bändälär, millätsez millätlär niqädär genä ğomum keşelek muzıka östendä baş watmasınnar, ataqlı rus kompozitorı Rimski Korsakov farazı mäñgelek bizmän bulıp qala birä, ä Rimski Korsakov: «Muzıka millättän tış yäşi almıy”,- dip qaldırğan.

Samar Duslıq yortında 20 milli üzäk üz qoralın, üz muzıkasın küpertep, ğorurlanıp kürsätte häm zaldağılar tarafınnan bu ğäcäyep samimi qabul itelde. Samar tatar milli xäräkäte wäkile bularaq 76 yäşlek Abdulla babay Akmaev ğadi genä kiemnän, ap - aq tübätäyennän säxnä urtasına çığıp bastı da ber keşelek orkestr oyıştırıp xalıqnı tañ qaldırdı. Minem: “Abdulla abzıy, sin niçek muzıka dönyasına kerep kitteñ?”- diüemä, mondıy cawap işettem.

“ Un yäşem tulğanda yazmış bezneñ ğailäne Dnepropetrovskiga itep taşladı häm şunda miña konsert qararğa turı kilde. Balalar balalaykada uynap mataşalar. Batırçılıq citep min dä sorap quydım: “Biregez äle, uynap qarıym”, - didem. Köy kilep çıqtı. Ğömeremdä berençe märtäbä qulıma mandolina aldım häm köy çığardım. Muzıkağa häwäslek qannan kilä bezdä. Babam da skripkada uynağan bit. Ğailädä şulay ide. Muzıka işetsäk aşarğa da soramıy idek. Enem zamanında Qazan konservatoriäsen tämamladı. Ğailädä dürt malay üstek. Barçabız da muzıkağa mökibbän bulıp yäşädek. 20 yıl buyına “Yalqınlı yäşlek” säxnäsendä uynadım. Märyäm ätiem dä bik matur cırlıy ide”,- di Abdulla abzıy Akmaev.

Festival'ne tügäräkläp sänğät akademiäse möğallime Anatoliy Storocenko bolay dide: “ Ägär keşe üzeneñ milli tamırların belmi ikän, üz moñınnan ayırılğan ikän, bu tulı qanlı yäşäyeş tügel. Vatanpärvarlıqnıñ ber kisägen xalıq muzıkası täşkil itä. Duslıq yortınıñ bu ğäcäyep ruxi baylığın zur säxnälärdä kürsätü teläge tudı”,- dide Samar däwlät mädäniät häm sänğät uqıtuçısı Mixail uğlı Anatoliy Storocenko.

Şamil Bahautdin,Samar.

XS
SM
MD
LG