Accessibility links

шимбә, 10 декабрь 2016, Казан вакыты 17:38

Semberdä millättäşebez Rusiä çempionı buldı


Ul'yan ölkäseneñ Arsqoyı awılı yanındağı qatlawlı - tawlı-taşlı, tayğaq yullarda yıl sayın Räsäy çempionatınıñ finalı bula. Uzğan yal könnärendä şundıy yarışta millättäşebez Binyämin Djepaev 10-ınçı märtäbä inde Räsäy çempionı isemenä layıq buldı. Şuşı uñışqa ireşüendä ul yaqtaşlarınıñ da öleşe barlığına iğtibar itte. Alar minem här uñay xäräkätemne xuplap, här yalğışuım öçen borçu belderep qıçqırıp tormasalar, bälki ciñep tä bulmas ide, çönki köndäşlär dä bik köçle bit, dide çempion.

Binyämin monnan başqa da bixisap ciñülär yaulağan tatar balası. 1989-yılda SSSR çempionı, 1992-yılda BDB illäre arasında oyıştırılğan berdän-ber şundıy bäygeneñ ciñüçese, Mongoliä, Bolğariä, Pol'şa kebek elekke sotsialistik illärdä uzğan xalıqara yarışlarda ciñüçe, 3 märtäbä Räsäy kubogı (qabı) xucası. Barısın da sanap betererlek tä tügel – yıl sayın 15 – 16 yarış bit.

Binyäminneñ änise qırım tatarı qızı. Bu xalıqnı törle yaqlarğa taratqanda, Sadiä xanımğa nibarı 5 yäş bula äle. Tuğannarı wafat kitkäç, Sadiä xanım tulı ber näseldän berüze qala. Näsel cebe özelmäsen öçen, Djepaevlar familiäse saqlanıp qalsın öçen, Binyäminneñ ätise rizalığı belän, aña üz familiäsen birä. Şunısı da şöker: irenä ul tağın 3 bala büläk itä. Şäwkät isemlese abıysı yanında mexanik bulıp eşli, yäğni anıñ maşinasın yarışlarğa äzerläwdä töp yärdämçese. Räşit belän Liliä äle uqular ğına.

Cäyä eçendä genä bulsa da, şunı da östise kilä: 17 yäşendä şiferlıqqa tanıqlıq alğan Binyämingä yul xäräkäte qağidälären häm maşina yörtü ostalığın üzläşterü buyınça anıñ möğallime sıyfatında, bu şäkert öçen şäxsi ğorurlıq xisläre kiçerergä dä bula.

Ayrat İbrahim, Sember

XS
SM
MD
LG