Accessibility links

шимбә, 3 декабрь 2016, Казан вакыты 09:54

İlfaq İbrahimov: “Kiläçäktä balalarğa yazuçı hönäreneñ bar neçkäleklären öyrätergä tieşbez”


Soñğı yıllarda ädäbiätkä yäş almaş kilü mäs’äläse, ädäbi mäydanda üzenä urın aluçılar kimede. Şunı istä totıp, bıyıl yazuçılar berlege qarşında yäşüsmerlär öçen “Ostazlar qanat quya” isemle ostaxanä eşli başlağan ide.

İnde menä noyäber başında yazuçılar berlege respublikanıñ tatar ädäbi - icat berläşmäläre citäkçelären Qazanğa cıydı. Yäş qäläm iäläreneñ icatın üsterügä yärdäm itü häm şähär-rayonnardağı ädäbi berläşmälär eşçänlegen kamilläşterü maqsatınnan uzdırıluçı bu çaranı açu tantanası 31 oktäberdä Tatarstan Yazuçılar berlege binasında uzdı. Anda Yazuçılar berlege räise İlfaq İbrahimov, anıñ urınbasarı Faqil Safin, Yazuçılar berlegeneñ ädäbi konsul'tantı Firdäwes Ähliä, şulay uq respublikabıznıñ 21 rayonınnan kilgän ädäbi - icat berläşmäläre citäkçeläre qatnaştı. Yazuçılar berlegendä uzğan utırışta İlfaq İbrahimov mondıy berläşmälärneñ yäş qäläm iälären barlaw, alarnıñ icadi ostalığın üsterüdä ähämiäte zur buluın bilgeläp ütte.

“Bezneñ mäktäplärdä ber digän tatar tele uqıtuçıları bar. Alar ädäbiät teoriäsen dä, tarixın da belä, alar üzläre dä icat itälär, ädäbi tügäräklär alıp baralar. Läkin alar balağa yazuçı bulu hönäreneñ orlığın birä almıylar. Bezneñ kiläçäktä balağa yazuçı hönäreneñ böten neçkäleklären ädäbiätçe bularaq öyrätergä tieşbez. Bez talantlı balalarnı tabırğa tieş.”

Ädäbi- icat berläşmäläre citäkçeläre isä üzlärendäge yañalıqlar xaqında söylädelär, problemaları belän urtaqlaştılar.

1-2 noyäber könnärendä seminar üz eşen Qazan däwlät mädäniät häm sänğät universitetında däwam itäçäk. Anda Rabit Batulla «Yazuçınıñ icat ostaxanäse», Rkail Zäydulla «Bügenge tatar poeziäseneñ üseş tendensiäläre», Rifat Sverigin «Bügenge tatar prozasınıñ üseş tendensiäläre», Mösäğit Xäbibullin «Tarix häm ädäbiät», El'mira Şärifullina «Ädäbiät uqıtuçılarınıñ sälätle balalar belän eşläw alımnarı» digän temalarğa leksiälär uqıyaçaq. Söyläm ostalığın üsterügä bağışlanğan ğämäli däreslärne Tatarstannıñ atqazanğan artistı Flera Xämitova alıp bara. Seminar qısalarında şulay uq şiğriät, proza, tänqit, publitsistika, dramaturgiä häm balalar ädäbiäte buyınça ostaxanälär ütkärü dä küzdä totıla.

Ädäbi – icat berläşmäläreneñ citäkçeläre ädäbiättä yäş almaş tärbiäläw turında belemnär tuplağaç, alarğa ädäbi berläşmä citäkçese digän tanıqlıq ta bireläçäk.

Gölnaz Şäyxetdinova

XS
SM
MD
LG