Accessibility links

якшәмбе, 4 декабрь 2016, Казан вакыты 09:11

Qırğızstan törmälärendä yaña fetnälär


Kilgän xäbärlärgä qarağanda sişämbedä Qırğızstannıñ berniçä törmäsendä yaña baş kütärülär bulğan. Fetnäne bastıru waqıtında 20dän artıq totqın üterelgän. Uzğan ayda ber deputat üterelgän Moldovanovka törmäsen militsiä kontrolgä alğan dip xäbär itelä.

Kilgän xäbärlärgä qarağanda, baş kütärülär bu yulı da başqala Bişkäk yanındağı 31 sanlı Moldovanovka törmäsendä başlanğan. Räsmilär bu törmäneñ "avtoritetı" sanalğan Aziz Batukaevnı başqa törmägä küçerergä telägän. Totqınnar moña qarşı baş kütärgän. Fetnälär ilneñ başqa törmälärenä dä küçkän. Qırğızstannıñ Yustitsiä ministrı Marat Kayıpov süzlärençä, xakimiät wazğiätne kontrolgä alırğa tırışa:

"Calalabad, Oş törmälärendä, şulay uq 3, 16, 27 sanlı törmälärdä wazğiät kontrogä alına. Anda fetnä başlaw färmanın Batukaev telefon aşa birgän."

Räsmilär äytüençä, totqınnarda qoral bulğan, häm utnı berençe bulıp alar açqan. Baş prokuraturanıñ maxsus prokurorı Kobanıçbäk Mamakaev:

"Batukaev soñnan birelde, bez anı İminlek xezmäte törmäsenä ozattıq. Anıñ äşnäläre älegä 31nçe törmädä qaldı."

Älegä räsmilär barı tik 4 totqınnıñ ülüen tanıdı. Ämmä totqınnar ülüçelär sanı küpkä kübräk di. Bişkäk yanındağı 1nçe törmädä utırğan vadim isemle totqın radiobıznıñ Qırğız bülegenä bolarnı söyläde:

"Bezdä ber, 31nçe törmädä – 18, 8nçe törmädä - 3, barlığı 22 keşe üterelgän. Bu bez belgäne genä. 18 casäd çığarılğanın totqınnar üz küzläre belän kürgän."

Moldovanovka törmäsendä berençe baş kütärülär ike atna elek bulğan ide. Totqınnar törmä şartların yaxşırtırğa taläp itkän. Üktäberneñ 19da alar belän söyläşergä dip bu törmägä deputat Tınıçbäk Äxmätbaev citäklägän törkem kilgän. Söyläşülär talaşu häm atışu belän tämamlanğan. Näticädä Äxmätbaev üze, anıñ ike yärdämçese häm törmä idaräse başlığı atıp üterelgän.

Äxmätbaev "lälä inqilabınnan" soñ üterelgän öçençe deputat buldı. Bu xäldän soñ Bişkäktä protest çaraları ütte. Anda qatnaşuçılar Äxmätbaevnıñ üleme öçen premier Feliks Kulıvnı ğäyepläde häm anı urınınnan kitergä taläp itte. Kulov monı säyäsi provakatsiä dip atadı. 6 könnän soñ prezident Qormanbäk Baqıev demonstrantlarnı tınıçlandıra aldı.

Qayber xäbärlärgä qarağanda deputat Äxmätbaevnıñ tuğanı – şulay uq kriminal avtoritet bulğan Rıspek Äxmätbaev – 31nçe törmäneñ avtoritetı Aziz Batukaev belän qan-doşman bulğan. Sişämbedä räsmilär Batukaevnı başqa törmägä küçerep sorawğa tartırğa cıyınğan.

Qayber küzätüçelär bu waqiğalarnı cinätäçel törkemnär arasındağı köräş dip bäyäli. Ämmä Qırğızstan törmlärendä çınlap ta naçar şartlar buluı belän barısı diärlek kileşä.

Sişämbedä Qırğızstannıñ keşe xoquqları wäkile Torsonbay Bäkir-ulı törmälärdäge naçar şartlarğa häm räsmilärneñ Moldovanovka törmäsendä köç qullanuına tänqit belderde.

-Ali Gilmi
XS
SM
MD
LG