Accessibility links

Кайнар хәбәр

Törkiädä "Zängär Ağım" açıldı


17 Noyäberdä Qaradiñgez yar buyı şähäre Samsunnıñ Durusu awılında “Zängär Ağım” Tabiği Gaz ütkrergeçeneñ räsmi açılış yolası bulıp uzdı. Şuşı räsmi yolağa RF Prezidentı Vladimir Putin, İtaliä Premiere Berluskoni häm anıñ Törek kollegası Erdoğan qatnaştılar. Mäğlüm bu ütkärgeç inde ike yıl çaması gaz ütkrep torsa da, räsmi räweştä açıluwı bugenge qalğan. Tabiği gaz Rusiäneñ İzobilnoedän Cubgağa 308 km, diñgez astınnan Samsunğa 390 km., Ankaraga isä 501 km.lek ber truba belän totaştırıla. Truba 1200 m. diñgezneñ tiränlegennän uza. Bu texnologiä berençe märtäbä qullanılğan. Törkiä şulay itep iñ küp gaznı Rusiädän ala başladı. Monnan elek tä Rusiäneñ Bulgaristan aşa cibärgän gazın qullanan ide. Törkiädä bu proyektqa qarşı bik zur tawış kütärelde. Xätta elekke ike energiä ministere östennän bu proyektqa korruptsiägä yul birdelär digän ğäyepläw belän xökem protsesı bara.

Mätbuğat organnarı bu yola ni xätle kiçekkän bulsa da bigräktä Putin belän Berluskoninıñ vizitlarına zur ähämmiät birdelär. Monı gazetalarnıñ rubriklarınnan kürergä dä mömkin. Sabah “ Zängär töştä yaña yul çıqtı”; Yeni Şafak “ Dönyanıñ energiäse Törkiädän ütäçäk”; Zaman “Putin Qaradiñgezgä yaña ber trupa tözik di”; Dünya “Erdoğan Törkiäne energiä koridorasına äwrelderärgä telibez di”; Milliyet “ Zängär töş oçraşuwı”; Hürriyet “ 14 yılnıñ iñ matur süzläre - Rus liderdan tınıçlıq mesajı” digän rubriklar belän çıqtılar.

Zängär Agımnı räsmi räweştä açu yolasına birelgän ähämmiät şuşı yollanıñ 270 jurnalist tarafınnan küzätep barıluwınnan da añlaşıldı. İtaliadan 50, Rusiädän 60 jurnalist kilgän ide. Ä saqlıq köçläreneñ sanı tağı da kübräk buldı. 3 meñ gendarmeriä belän 400 politsiä qunaqlarnı saqlarğa tırışsalar da, Putinneñ üz 217 tän saqçısı bar ide. Rusiäneñ taläbe buyınça çıyılış urnı da soñğı minutta üzgärtelde. Putinnıñ aşı da Mäskäwdän kiterelgän ikän. Yola ütkärelgän Durusu awılı xalqı isä tağın da meskenräk xälgä töştelär. Yola möddäte buyınça, alarnı ğına tügel, xätta terleklären dä uramnarğa çığamadılar.

Putin çığışında Zängär Ağımğa östämä ber ütkärgeç salu täqdimen yasadı. Putin ayruça Sovetlar Berlegeneñ Törkiä bäysezlek suğışı alıp barğanda yardäm kürsätkän buluwın da iskä töşerde. Erdoğan da Törkiäneñ enegiä koridarasına äwrelüwenä, Törkiä aşa uzğan energiäneñ Avropa belän Yaqın Könçığışqa bigräktä Izraelgä tapşırılu buyınça çaralar kürelüwenä basım yasadı.

CNN-Turk Televiziäseneñ Mithat Bereket tarafınnan alıp barılğan “Manşet” programası da şuşı vaqiğägä bağışlanğan ide. Bereketneñ qunaqlarınan Prof. Nadir Devlet ike il arasında tik gaz belän neft säwdäse bulmawına, ä Törek eşquwarlarınıñ Russiädä tözü, kiyem häm azıq-tölek sektorlarında baytaq uñışlı eşlär başqarularına, häm Russiäneñ Törkiäneñ säwdäsendä Almaniädän soñ ikençe urınnı aluwına basım yasadı.

Berlusconi, Putin häm Erdoğan yabıq işeklär artında da söyläştelär. Şiksez bu yola asılda ber sıltaw ğına bulğan bulsa kiräk. Energiä ütkärgeçläre turında şiksez yaña plannar da telgä alınğandır. Radikal gazetasına mäxsus mäqalä yazğan Rusiä İndustiä häm Energiä Ministere Viktor Xristenko ike yaqlı ekeonomik mönäsäbätlärneñ täräqqiäte turında sannar kitergän. Ul un yıl eçendä Törek şirkätläre 12 milliard dollarlıq tözü kileşüwenä qul quydılar dip yaza. Başqa süzlär belän äytkändä ike il arasındağı ekonomik xezmätdäşlek här yıl sayın diärlek üsä bara. Putinnıñ Törkiägä vizitı da monı rastlawçı ber fakt buldı.

Äxtäm İbrahim, İstanbul
XS
SM
MD
LG