Accessibility links

шимбә, 3 декабрь 2016, Казан вакыты 22:46

Tufan Miñnullinnıñ 70 yäşlek yubiley kiçäse


Ğ.Kamal teatrında uzğan bu yubiley kiçäsendä Tufan Miñnulinnı qotlarğa respublikanıñ iñ däräcäle citäkçeläre, deputatlar, yazuçılar, Rossiäneñ törle töbäklärendäge tatar häm başqort teatrları, Tatarstan teatrları citäkçeläre , artistları häm dä anıñ tuğan yaqlarınnan yaqtaşları kilgän ide. Häm ğomumän, zal teatr sänğäten söyüçe tamaşaçı belän şığrım tulı ide.

Tatarstan Prezidentı Mintimer Şäymiev Tufan Miñnullinnı yubileye belän qotlap, aña respublikanıñ iñ yuğarı büläge sanalğan Tatarstan aldındağı xezmätläre öçen” ordenı tapşırdı. Bu ordennı berençelärdän bulıp sänğät ähelläre arasında äle İlham Şakirovqa ğına tapşırğannar ide.

“Tufan Miñnullin- xalqıbıznıñ iñ bulğan ullarınıñ berse” dide anıñ turında Tatarstan Prezidentı .

Näq şul könne 21 noyäberdä Tatarstan prezidentı Mintimer Şäymiev Tufan Miñnullinğa xalıq yazuçısı iseme birü turındağı ukazğa qul quyğan. Tufan Miñnullin Tatarstan Yazuçılar berlegeneñ räise bulıp torğanda Tatarstan Xalıq yazuçısı digän isemne buldıru turında 80 ençe yıllarda uq inde üze täqdim kertkän ide. Häm bu isemgä inde bik küplär layıq buldı. Häm Prezident, yazuçı, deputat Tufan Miñnullinıñ kükrägenä, “Tatarstan xalıq yazuçısı” bilgesen dä elde.

Tufan Miñnullin- çın xalıq yazuçısı!-dide Prezident Mintimer Şäymiev. Häm Tufan Miñnullin bu isemne inde xäzer üze dä aldı.

Kiçädä Tufan Miñnullin qotlawlarğa räxmätlären belderde.

“Minem xäter sandığımda iñ çista xatirälärem saqlana, anda yäşlek mäxäbbätem dä bar, iñ qäderle keşeläremneñ dönyadan kitkän istälekläre dä bar, awıldaşlarımnıñ, yaqtaşlarımnıñ istälekläre dä bar, däwlät citäkçeläreneñ xörmäte dä, mine olılawları da , minem xezmätemne bäyälägän istälekläre dä bar , iñ qäderlese, bergä ğömer kiçergän teatr kollektivım da bar”,- dide ul.

Yubiley kiçäsendä Tufan Miñnullinnı qotlap İlham Şakirov, Zilä Sönğatullina, Salawat Fätxetdinov, Nail Äyupov, häm yäş cırçılardan Aygöl Sağınbayıva yubilyarnı xalıq yaratqan cırlar belän qotladılar. Ä yähüdlärneñ “Simxa”ansamble bu kiçädä Foat Äbübäkerev citäkçelegendä çığış yasadı. Häm bik küp başqa muzıkal'' qotlawlar da buldı . Ä xäzer Lyutsiä Nizamova isemle ber yäş tamaşaçı fikeren dä tıñlap kitik äle.

“Tufan abıy üz fikeren äytergä qurıqmıy. Häm anı şunıñ öçen dä yaratalar, xörmät itälär. Ä monı här keşe dä eşli almıy. Ul berdänber!”,- dide ul.

Yubiley kiçäsendä tamaşaçı yaratıp ölgergän spektakl''lärdän özeklär kürsätelde. Şular arasında “Änilär häm bäbilär”, “Moñlı ber cır”, “Şäcärä”, “Ğäliäbanu sıluım irkäm”, säxnädä 600 tapqır uynalğan “Diläfrüzgä dürt kiäw”spektaklennän häm 30 yıl buyı teatr säxnälärennän töşmägän “Äldermeştän Älmändär”spektaklennän dä küreneşlär buldı.

Mälikä Basıyr, Qazan

XS
SM
MD
LG