Accessibility links

шимбә, 10 декабрь 2016, Казан вакыты 09:55

Rinat Zakirov tatar studentları belän oçraştı


Oçraşuğa yäşlär küp kenä kilgän ide. Ni disäñ dä, öç yıl däwamında Kongressnıñ yärdäme belän Qazannıñ yuğarı uqu yortlarına 216 bala uqırğa kergän. Şularnıñ 25 BDB illärennän. Cıyılışnı Bötendönya tatar Kongressı Başqarma komitetı räise Rinat Zakirov açıp cibärde

Qazan yuğarı uqu yortlarınıñ mömkinlege çiksez tügel, ämma ul şaqtıy zur. Här VUZ 10 meñnän artıq keşe qabul itä ala. Häm bez Tatarstannan çittä yäşäwçe millättäşlärebezneñ balaları monda uqırğa xoquqlı dip sanıybız. Sanıybız ğına tügel, eşlärgä dä tırışabız. Rusiä töbäklärendä yäşäwçe yäşlärebez tatar telendä belem alırğa teli ikän, alarnıñ berdän ber yulı - Qazanğa kilü, Qazan moxitendä yäşäw, uqu.

Tatar studentları belän oçraşuğa Däwlät Sovetınıñ mädäniät, fän, mäğärif häm milli mäs'älälär buyınça komitet räise Räzil Väliev tä kilgän ide. Ul Tatarstan Konstitutsiäsenä, çittäge tatarlarğa yärdäm itü xaqındağı 14 matdäne kertügä zur öleş kertkän keşe. Räzil Väliev söyli

Tatarstan Konstitutsiäseneñ ul matdäsenä bez bolay itep yazıp quydıq. Tatarstan respublikası Tatarstannan çittä yäşäwçe millättäşlärebezgä, alarnıñ milli mäğärifen, mädäniäten üsterüdä, milli üzençäleklären saqlawda yärdäm itä. Bötendönya tatar kongressınıñ çittä yäşäwçe tatar studentlarına yärdäm itüe dä Konstitutsiäseneñ näq şuşı matdäsendä nigezlänep eşlänä.

Rusiä töbäklärendäge tatar ictimaği oyışmaları studentlarnı Tatarstanda uqıtuğa citdi qarıy. Ämma BDB häm Baltıyk illäre bu mömkinlektän bik faydalanmıy dide Rinat Zakirov. Rinat äfände küptän tügel Qazanğa uqırğa kilgän Qıtay tatarları turında ozaqlap söyläde. Qıtaynıñ Sin'szan-Uyğır rayonınnan kilgän 36 millättäşebez äle ike telle kurslarğa urnaşa ikän. Kiläse yılğa inde alar Qazannıñ texnologiä universitetına imtixannar tapşıraçaq.

Oçraşuda ğalimnär dä buldı. Mirqasıym Usmanov, Damir İsxaqov, Wasil Ğarifullin häm başqalar kilgän ide. Damir İsxaqov tatar studentlarına ike täqdim belän möräcäğät itte

Minemçä, çittän kilüçe studentlarğa üzläreneñ berläşmälären tözergä kiräk. Yaqtaşlıq nigezendä yäisä vuzlar belän. Anı tatar yäşläre forumına totaştırırğa kiräk. Ul çaqta sezneñ ayırım ber oyışma bula häm kilep tuğan mäs’äläläregezne bergäläp çişärgä mömkinlek tuaçaq. İkençe täqdimem. Uqunı däwam itärgä teläwçelär 2-3 kurslardan uq äzerlänergä tieş. Monıñ öçen fänni-ğamäli konferensiälärgä yörergä, ğalimnär belän elemtälär urnaştırırğa kiräk.

Rinat Zakirov äytüençä, uqırğa teläwçelärdän ğarizalar yıl sayın şaqtıy küp kilä. Bıyıl, mäsälän, Kongress 200dän artıq ğariza qabul itkän. Ämma abiturientlarnıñ yartısı diärlek imtixan birergä kilmi. Kilgännärneñ dä qayberläre ğomumän äzerleksez dide ul.

Älege cıyılış üget-näsixätkä qaytıp qaldı. Ğalimnär dä, cämäğät eşlekleläre dä milli berdämlek turında söylädelär. Tik menä studentlarnıñ üzläreneñ Qazanda nindi problemaları bulğanlığı xaqında ğına ber süz dä äytelmäde.

Al'bina Zäynulla

XS
SM
MD
LG