Accessibility links

якшәмбе, 11 декабрь 2016, Казан вакыты 03:17

“Ruxiät”tä kitap bäyräme


Xökümät tarafınnan bastırılası kitaplarnı yazuçılar öçär yıl kötep alalar, çirat toralar, “Ruxiät”tä isä kitap ber yıl eçendä planğa kertelä häm dönya kürä. Üzen näşriätneñ senzorı buldım digän Tufan Miñnullin äytüençä, Tatneft' oyışması Qazanda yäşäwçe ädiplärebezne genä qayğırtıp qalmıyça, awılda icat itüçe yazuçılarnıñ da kitapların bastırırğa tırışa, ayıruça neft' çığarıla torğan rayonnarda yäşäwçelärneken. Tufan Miñnullin “Ruxiät”kä räxmät äytte, şuşı könnärdä anıñ da “Tatarnıñ ber balası” digän kitabı çıqtı.

Tufan Miñnullin respublikabızda bay oyışmalarnıñ küp buluın assızıqladı, läkin ädäbiät, sänğät ölkäsendä yärdäm kürsätergä aşığuçılarnıñ bulmawın da bilgeläp ütte. Anıñ fikerençä, tatar üzen-üze qotqarırğa tieş, qayandır çittän yärdäm kötmäskä, bälki, üz baylarıbız cilkäsenä tayanırğa kiräk, ä “aqçasın qoçaqlap yoqlağan” keşelär tarix häm millät öçen yuq, alar onıtılaçaq. XX yöz başında yäşägän bertuğan Rämiewlär häm bügengedä eşläp kilüçe Tatneft' kebek oyışmalarnı isä ürnäk itep quydı.

Tatneft'neñ qaramağında näşriät kenä tügel. Yazuçılar berlege räise – İlfaq İbrahimov üz çığışında yäş, aktiv icatçılarğa ber meñ sum külämendä un stipendiä bilgelänäçägen äytte. Bolar da Tatneft' oyışması ximayäse.

Kiçädä Rädif Ğataş, Razil Väliev häm Foat Sadriev ta çığış yasadılar. Foat Sadriev äybät ädäbiätneñ televideniedän kürsätelä torğan äxlaqsızlıqqa qarşı torıp, uquçığa uñay tä'sir itä aluı turında äytte.

Kiçädä 236 meñ sumlıq ber meñnän artıq kitap Milli kitapxanägä, şulay uq Tatar kongressına, Qamal teatrı kitapxanäsenä häm Qazan däwlät universitetına büläk iteläçäge iğlan itelde.

Aydar Camali

XS
SM
MD
LG