Accessibility links

Кайнар хәбәр

Qazan täcribäsen Uralda teläp qabul ittelär


Bu könnärdä Yekaterinburg şähärendä Sverdlovski ölkä dumasınıñ maxsus utırışı bulıp uzdı. Däwlät häm ölkä duması deputatları, cirle xakimiät orğannarı wäkilläre, ere, urta häm waq biznes citäkçeläre, ğalimnär qatnaşında uzdırılğan bu kiñäytelgän utırışta, Qazan şähäre misalında, anda yuğarı üseş alğan “İdeyä” texnoparkın Ural töbägendä üsterü yulları häm tormışqa aşıru problemaları qaraldı. Qazannan maxsus bu çarağa dip kilgän “İdeyä” texnoparkınıñ general' direktorı urınbasarı, texnik fännär doktorı, professor Sergey Yuşkonıñ çığışın cıyıluçılar bik qızıqsınıp tıñladılar. Sergey Vladimiroviç Qazan şähärendä inde ike yılğa yaqın eşläp kilgän texnoparknıñ eş täcribäläre belän urtaqlaştı, oyıştıru etabında nindi qarşılıqlar oçraw mömkinlege häm alarnı ciñü yulları turında söyläde, bu eştä bergäläşep xezmättäşlek itärgä çaqırdı. Anıñ äytüençä, Tatarstan respublikası häm Sverdlovski ölkäseneñ ayırım predpriätieläre arasında mondıy xezmättäşlek citärlek däräcädä uñışlı bara. İke töbäkneñ dä intellektual milege ber-bersen tulılandırıp, yaña fänni açışlar yärdämendä ayırım citeşterü protsessları innovatsion texnologiägä salına. Bu xezmättäşlekneñ uñay näticäläre inde kürenä, dide Sergey Vladimiroviç.

İqtisadi yaqtan ğayät zur ähämiätkä iä bulğan bu eşne däwlät säyäsäte däräcäsenä kütärü zarur. Utırışta qatnaşuçılar bertawıştan şundıy fikergä kildelär. Biredä çığış yasawçılarnıñ kübese, quätle promıyşlennost üzäge bulıp sanalğan Ural töbägendä citeşterü protsessın innovatsion texnologiälär qullanu yulı belän yaña basqıçqa kütärüneñ möhimlegen assızıqlap, bu aldınğı täcribäne öyränüne kiräk taptılar. Sergey Vladimiroviç Yuşqo Sverdlovski ölkäse parlamentı utırışı qararı belän qänäğät qaluın belderde.

“İdeyä” texnoparkı bügen Ural predpriätieläre belän bäyläneşne Tatarstannıñ Uraldağı daimi wäkillege arqılı alıp bara. Ämma bu eş belän şöğellänüçelär ozaqlamıy Uralda şundıy uq texnopark tözelep eşli başlar digän ışanıç belderälär. Sverdlovski ölkäsennän tizdän Qazanğa bu täcribäne öyränü öçen wäqälätle delegatsiä yunäläçäk.

Fäwiä Safiullina, Yekaterinburg
XS
SM
MD
LG