Accessibility links

җомга, 9 декабрь 2016, Казан вакыты 13:02

Omskida Başqortstan artistları konsertı


Tatarstannan çittä yäşäwçe tatarlarnı küpläp bergä cıyıp, inde yuğala başlağan milli xislären yañartıp toruçı çaralarnıñ berse dip tatar sänğät'kärläre konsertların äytergä buladır. Ayıruça Tatarstannan yäisä Başqortstannan hönäri artistlar kilgän oçraqlarda. Şuşı könnärdä genä Omski tatarların küpläp Başqortstannıñ Neftekama şähärennän kilgän filarmoniä artistları konsertqa cıydı. Bu -“Qaytawaz” estrada törkeme Omskiğa “Fäniä” dip isemlängän yäşlär studiäse çaqıruı buyınça kilgän ide. Äytergä kiräk, Tatarstan artistları Omskiğa yılğa ber märtäbä bulsa da kilep kitälär, ä Başqortstan yağınnan kilüçelär siräk bula. Soñğı märtäbä monnan 10 yıllar elek Ufadan “Ant” törkeme bulıp kitkän ide. Alarnıñ konsert programmaları barı tik başqort cırlarınnan torğan bulsa, älege “Qaytawaz” törkeme konsertında tatar cırları ğına başqarıldı. Döres, säxnädän başqort tele dä yañğıradı. Alıp baruçı Zilä Äbdelmanova tamaşaçı sorawı buyınça Anğam Atnabayıwnıñ häm Mostay Kärimneñ şiğerlären uqıdı.

Zilä Ä.: Gel yullarda yöri keşe,yullarda ütä gümer...

Äytergä kiräk, Seber yağında yäşäwçe tatarlar arasında tatar-başqort mädäniäten taratuda «Qaytawaz» törkemeneñ öleşe yuq tügel.Tömän ölkäseneñ küp kenä şähärlärendä alar inde berniçä märtäbä bulğannar. Ä Omski, Novosibirski yaqlarına niçekter yulları töşmägän. Citäkçeläre Rifqat Gabdelcanov süzlärençä, kiläçäktä alarnıñ marşrutlarına hiçşiksez bu şähärlär dä östäläçäk.

Rifqat G.: Tığız elemtädä eşlärbez tatar –başqort oyışmaları belän, kübräk yoribez seber yaqlarında, Tömän tirälärendä, Svedlovsk ölkäse, Perm, Orenburg ölkälärendä. Qayda bezneñ tatar-başqort xalqı kübräk yäşäü , bez ul ölkälärne yaxşı beläbez häm yılğa ber tapqır şuşı krugnı urap çığabız. Omski xalqı berençe könnän bezneñ ruxıbıznı kütärep cibärde, ışanabız, inde başqa şähärlärdä -Tara,Tömän, Tomskida da şulay xalıq bezne qarşı alır. ... ışanam, xalqıbız telen yuğaltmas, üzeneñ cırların yuğaltmas, yäşär häm yäşäsen.

Bu «Qaytawaz» törkeme citäkçese Rifqat Gabdelcanov buldı. Omskidan soñ Başqortstan artistları ölkäneñ Tara şähärendä dä çığış yasap qayttılar. Tarada yäşäwçe tatar xalqı öçen Başqortstan artistları konsertı çın mäğnäsendä bäyräm buldı. Döres, xäzerge waqıtta bu zur bulmağan seber şähärendä yäşäwçe millättäşlärebez dä tatar cırı işetergä zar bulıp utırmıylar – yış qına Tara häm kürşe-tirä rayonnar häwäskär kollektivlarınıñ konsertları bulıp tora, Tara tatar mädäniät üzäge törle bäyrämnär, milli çaralar oyıştıra. Annan tış xalıq kassetalar, tälinkälär aşa tatar cır sänğäte belän tanışıp bara. Şulay da hönäri artistlar konsertın qaraw xalıq öçen üze ber zur waqiğağa äylänä. Tarada ğädättä cirle häwäskärlär konsertına 100-gä yaqın ğına tamaşaçı cıyılsa, älege konsertta 300 keşelek zalda buş urınnar qalmağan ide.

Rozaliä Sayganova, Omski

XS
SM
MD
LG