Accessibility links

якшәмбе, 11 декабрь 2016, Казан вакыты 09:06

Tel mäsälälärenä bağışlanğan konferensiä ütte


Comğa könne Ufada tel mäsälälärenä bağışlanğan töbäqära fänni-ğämäli konferensiä bulıp ütte. “Başqortstan Respublikında tel säyäsäte häm telne qullanu dairäsen kiñäytü” dip isemlängän bu cıyınnıñ ütäçäge xaqında aldan älläni xäbär dä itelmägän ide. Şulay da anda respubliknıñ qayber yuğarı citäkçeläre dä qatnaşuı bu cıyınnıñ yaxşı ğına äzerlängänlegenä işarä buldı. Şunısı da açıqlandı – bu kiñäşmägä nigezdä başqort tel ğälimnäre häm başqort milli oyışmaları citäkçeläre genä çaqırılğan bulıp çıqtı. Tatar tel belgeçläreneñ berse dä bulmadı anda. Könneñ berençe yartısında uzğan plenar utırışta çığışlarnıñ da zur küpçelegen başqort ğälimnäre genä yasadı.

Konferensiägä kilgän Başqortstan mädäniät häm milli säyäsät ministrı İldus İlişev ta biredä zur ğına doqlad söyläde. Däwlät orğannarınıñ tel mäsälälären xäl itüdäge role häm telne qullanu dairäsen kiñäytü xaqında baytaq qına mäğlümatlar birde ul.

Ğälimnär Firdäwes Xisametdinowa, Räşit Şäkür häm başqalar üz çığışlarında şulay uq ana telen, yağni başqort telen qullanu dairäsen kiñäytü mäsälälären kütärde. Räşit Şäkür respublikta telneñ toponıymiäse yünäleşendäge qayber küzätüläre, fänni tikşerenüläre näticäläre belän urtaqlaştı. Başqort telen däwlät tele bularaq qullanunı qämilläşterü kiräklegen äytte ul. Şulay uq, uramnar, oyışmalar, toraq punktlar isemnären yazğanda, räsmi doqumentlarnı tutırğanda başqort teleneñ bozıluına da iğtibarnı yünältte başqort ğälime.

Töştän soñ, tel mäsälälärenä bağışlanğan kiñäşmäneñ ikençe öleşe başlandı. Ğälimnär bu yulı seksiälärgä bülenep eşläde. Öç seksiädä barğan fiker alışular, alarnıñ isemnärennän ük kürenüençä, Başqortstandağı tel säyäsäteneñ törle yünäleşlären qolaçlıy ide. Başqortstanda başqort tele qanun nigezendä däwlät tele dip iğlan itelsä dä, anıñ yoğıntısı älläni arta almadı. Bu xäl başqort ğälimnäreneñ häm başqort millätçeläreneñ üzlären dä nıq borçıy. Başqort telen däwlät tele dip iğlan itü belän genä barlıq mäsälälär dä xäl itelmi, bu yünäleştä köndälek tınğısız xezmät kiräk, dip belderä alar.

XS
SM
MD
LG